Azərbaycan, Bakı, 11 sentyabr / TrendCap , müxbir İ.Xəlilova/ "Azersun Holding Masazırda $12 mln. dəyərində yodlaşdırılmış və saflaşdırılmış qida duzunun istehsalı üzrə yeni zavodun tikintisinə ərəb sərmayədarlarının cəlb edilməsi üzrə müqaviləni imzalamağa hazırlaşır", - Azersun Holding-in prezidenti Abdolbari Gözəl deyib.
"Ərəb şirkəti "Golf Star" layihənin maliyyələşdirilməsinin 50%-ni öz üzərinə götürməyə hazırdır və artıq iştirakını təsdiqləyib", - Gözəl bildirib.
Bu, Azərbaycan İnvetisiya Şirkətinin (AİŞ) 2008-ci ilin iyununda ərəb sərmayədarlarının iştirakı ilə keçirdiyi konfransdan sonra İran Körfəzi ölkələrinin Azərbaycana qoyduğu ilk yatırım olacaq.
Qalan vəsait Azersun Holding tərəfindən AİŞ-də iştirak payı hesabına ödəniləcək. İnvestisiya şirkəti layihəyə $2,9 mln. qoymaq niyyətindədir və o, "Azərbaycan duzu" İstehsalat Birliyi QSC-nin Nizamnamə kapitalında 25 faiz iştirak payı alıb.
Holdinq rəhbərinin sözlərinə görə, ərəb sərmayədarları zavodun istismarından üç-dörd il sonra qoyduqları sərmayələri götürmək niyyətindədirlər. Buna müvafiq olaraq, onların layihədən çıxması beş ildən sonra mümkün olacaq. Zavodun 2009-cu ildə işə salınması gözlənilir və bir ay ərzində zavodun təməl daşı qoyulacaq. İsveçrənin "Evoterm" şirkəti respublikaya müəssisənin tikintisi üçün lazım olan zəruri avadanlıqları göndərib. Tikinti işlərini Türkiyənin "Inova" şirkəti aparacaq. Zavodun tikintisi üçün yeddi hektarlıq sahə ayrılıb. Torpaq Azersun Holding və AİŞ-in təsis etdiyi "Azərbaycan duzu" İstehsalat Birliyi QSC-nin şəxsi mülkiyyətinə verilib.
Zavod Masazır gölü yaxınlığında tikiləcək. Bu ərazidə zavod və göldən duzun yığılması üçün infrastruktur (nasoslar və s.) yerləşəcək. Duz ilk əvvəl Masazır gölündəki sahələrdən yığılacaq. Lakin gələcəkdə Türkmənistandan tədarüklər nəzərdə tutulub. Türkmənistandan tədarük zavodun tikintisindən il yarım sonra başlaya bilər. İstehsal hələ ki, yerli duza istiqamətlənəcək.
Zavodda hər gün 200 ton yodlaşdırılmış qida duzu istehsal etmək planlaşdırlır. Əvvəllər hər gün 100 ton qida duzu istehsal etmək nəzərdə tutulub. İllik istehsal isə 30 min ton təşkil edəcək.
UNİCEF-in donor dəstəyi ilə həyata keçirilən "Yod və yodlaşdırılmış universal duz çatışmazlığı problemi" layihəsi yod çatışmazlığı probleminin aktuallığını göstərib.
Sentyabrın 11-nə rəsmi valyuta məzənnəsi 0,8159 AZN/USD-dır.