Azərbaycan, Bakı, 23 oktyabr/ Trend , müxbir N.İsmayılova/ADA Group şirkətlər qrupu ölkədə Beynəlxalq Maliyyə Korporasiyasının (BMK) maliyyələşdirdiyi Almalı brendi altında supermarketlər şəbəkəsinin yaradılması layihəsinin 80 faizini realizə edib. İndiyədək Azərbaycanın üç iri şəhərində 40 market açılıb.
ADA-nın Direktorlar Şurası səhmdarlarının iştirakı ilə keçən iclasda, şirkətin menecmenti ötən dövr ərzində görülən işə görə hesabat verib.
ADA şirkətlər qrupu 2005-ci ildə yaradılıb, 2007-ci ildə ümumi dəyəri 50 mln. dollar olan Almalı supermarketlər şəbəkəsinin yaradılması layihəsi start götürüb. BMK ADA-Ticaret SC - yə 18 mln. dollar ayırıb. Bu vəsaitin 6 mln.-u şirkətin kapitalında iştirak, 12 mln. inkişaf üçün nəzərdə tutulub.
Ötən dövr ərzində merçandayzinq, avtosifariş, un məmulatlarının satışı, reinjinirinq, informasiya - idarəetmə sisteminin, kateqoriyalar üzrə menecment institutunun yaradılması üzrə layihələrə start verilib.
Doqquz ay ərzində Almalı - nın 14 yeni mağazası açılıb və bu, 500-dən çox iş yeri yaratmağa imkan verib. Bakı, Sumqayıt və Gəncə üzrə 40 supermarketin açılması ilə 2000-ə yaxın iş yeri açılıb.
Şirkət 2007-ci ilin sonunadək ən azı 50 market açmağı nəzərdə tuturdu.
BMK-nın səhmdarlığa daxil olmasınadək, ADA şirkətinin səhmlərinin 80 faizi, biri Rusiya vətəndaşı olmaqla, üç özəl şəxsin təsis etdiyi Avstriyanın A & DA Holding GmBH şirkətinə məxsus olub. Qalan 20 faiz şirkətin azərbaycanlı menecmenti arasında paylaşdırılmışdı.
Oktyabrın 23 - nə olan cari mübadilə məzənnəsi -- 0,8115 AZN/USD.
Müəlliflə əlaqə saxlamaq üçün elektron ünvan: [email protected]