Azərbaycan, Bakı, 03 noyabr/ Trend , müxbir Ü.Sadıqova/ Ölkələrin zəngin tarixi və mədəni ehtiyatlarını nəzərə alaraq, Azərbaycan və İsrailin turizmin inkişafı üçün yaxşı perspektivləri var, - İsrailin Turizm Nazirliyi Mərkəzi və Cənubi Avropa Departamentinin rəhbəri Yahuda Şen hesab edir.
Bakıya səfəri zamanı Şen, Azərbaycanın müxtəlif turizm agentlikləri ilə iki ölkə arasında turizmin inkişafı sahəsində sazişlər paketini müzakirə edəcək.
Onun sözlərinə görə, Azərbaycan dünyanın müxtəlif xalqlarının ənənələrinin qovuşduğu yerlərindəndir. "İsraildə də analoji hal müşahidə olunur", - Şen Trend -a bildirib.
Onun sözlərinə görə, Azərbaycanın Xəzər sahilində əlverişli möqeyi, zəngin təbiəti və mətbəxi turizmin genişlənməsinə böyük imkanlar yaradır.
Azərbaycan və İsrailin - sürətlə inkişaf edən iqtisadiyyata malik iki ölkənin turizm sahəsində əməkdaşlığı böyük maliyyə faydası gətirəcək.
İsrail Qafqaz ölkələri ilə turizm sahəsində əməkdaşlıqda maraqlıdır.
"Biz artıq Gürcüstanla birgə proqram hazırlamışıq və Azərbaycanın Turizm Nazirliyi ilə analoji sənədləri imzalamaq niyyətindəyik", - Şen bildirib.
O əmindir ki, bir neçə ildən sonra turizm Azərbaycan və İsraili bağlayan mühüm halqalardan biri olacaq.
"Yeddi il əvvəl turizm sahəsində Polşa ilə sıx əməkdaşlığa başlamışıq. O zaman İsraildə cəmi 500 turist var idi. Bizim nazirlik və turoperatorlarımızın uğurlu işi sayəsində, bu gün turistlərin sayı 100 min nəfəri ötür", - o söyləyib.
Şenin sözlərinə görə, İsrail turizm münasibətlərinin inkişafında Azərbaycanla təcrübə mübadiləsinə hazırdır. Turizm iki əsas prinsipə söykənir: dövlət və özəl sektor.
İsrail dövləti özəl turizm sahibkarlığı ilə məşğul ola biləcək peşəkar turoperatorlar və bələdçilərin tədrisinə və hazırlanmasına xeyli sərmayə yatırır.
"İsrail əhalisinin 10 faizi turizm sahəsində biznes qurur və hesab edirik ki, bu sahə ölkəyə gələcəkdə rekord sayda - üç milyon turistin gəlməsinə nail olmaqda kömək edəcək", - Şen bildirib.
Müəlliflə əlaqə saxlamaq üçün elektron ünvan: с[email protected]
