Azərbaycan, Bakı, 13 noyabr/ Trend , müxbir İ.Xəlilova/ "2009 - 2012-ci illərdə Azərbaycanda infrastrukturun inkişafına 14 mlrd. manatdan çox sərmayə yatırmaq planlaşdırılır ki, bu da sahibkarlıq üçün əlverişli şəraitin yaradılması baxımından çox vacibdir", - iqtisadi inkişaf naziri Şahin Mustafayev cümə axşamı 2009-cu ilin dövlət büdcəsi layihəsinin müzakirəsi üzrə Milli Məclisin plenar iclasında bildirib.
"Dövlət bu vəsaitləri beynəlxalq tranzit dəhlizlərin, ölkədə kommunal infrastrukturun inkişafına yönəltmək niyyətindədir", - nazir bildirib.
Onun sözlərinə görə, respublika regionlarının inkişafına xüsusi diqqət ayrılacaq. Bu tədbirlər yeni "2009-2013-cü illərdə Azərbaycanın regionlarının sosial-iqtisadi inkişafı dövlət proqramını" çərçivəsində həyata keçiriləcək. 2008-ci ildə dövlət sərmayələrindən regionların inkişafına 2 mlrd. manatdan çox vəsait yatırılıb ki, bu da ümumi sərmayələrin 47 faizini təşkil edir.
"İqtisadiyyatın neft sektorundan asılılığını götürmək üçün qeyri - neft sektorunun inkişafı dövlətin strateji istiqamətidir", - Mustafayev bildirib.
Nazirin sözlərinə görə, bu istiqamətdə münasib biznes- mühitin yaradılması məqsədilə, qanunvericiliyin təkmilləşdirilməsi üzrə iş aparılıb (parlamentə "Rəqabət haqqında" Məcəllə, "Xüsusi iqtisadi zonalar haqqında", "Sərmayə fəaliyyəti haqqında", "İxrac məqsədilə neft-qaz sektorunda xüsusi rejim haqqında" qanun layihələri təqdim edilib) və müəyyən islahatlar həyata keçirilib. Lakin gələcəkdə onların dərinləşdirilməsi planlaşdırılır. 2008 - ci ilin əvvəlindən biznesin dövlət qeydiyyatı üçün "vahid pəncərə" prinsipinin tətbiqi belə tədbirlərdən biridir. Gələn ildən nəzarət-buraxılış məntəqələrində də analoji sistem yaradılacaq.
Noyabrın 13-nə olan cari mübadilə məzənnəsi -- 0,8104 AZN/USD.
Müəlliflə əlaqə saxlamaq üçün elektron ünvan: [email protected]
