Azərbaycan, Bakı, 14 noyabr/ Trend , müxbir İ.Əlizadə/ "Azərbaycanın kənd təsərrüfatı məhsulları istehsalçıları üçün vergi güzəştləri daha beş il müddətinə artırılacaq", - parlamentin Iqtisadi siyasət daimi komissiyasının sədri Ziyad Səmədzadə cümə günü Milli Məclisin Qanun layihəsinin müzakirəsi üzrə plenar iclasında bildirib.
Onun sözlərinə görə, kənd təsərrüfatı məhsulları istehsalçılarının torpaq vergisi istisna olmaqla, bütün vergi növlərinin ödənilməsindən azad edilməsi onların maddi rifahını yaxşılaşdıracaq.
Güzəştlər kənd təsərrüfatı məhsullarının istehsalı sahəsində çalışan hüquqi və fiziki şəxslər üçün vergi tətillərinin tətbiqini nəzərdən tutan 2001-ci il 27 yanvar tarixli Qanunun müddətinin başa çatması ilə əlaqədar, 2009- cu il yanvarın 1- dən tətbiq ediləcək.
Bu tədbirlər Azərbaycan hökumətinin bu gün bütün dünyada aktual məsələ olan ərzaq təhlükəsizliyi üzrə Dövlət Proqramı çərçivəsində görülən tədbirlərin bir hissəsidir. Aqrar-sənaye kompleksi subyektlərinə Azərbaycan prezidentinin 2007-ci il 27 yanvar tarixli sərəncamı çərçivəsində, müxtəlif formalarda yardım göstəriləcək. İstehsalçılara mineral gübrələr, yanacaq-sürtkü yağlarının dəyərinin 50 faizinin ödənilməsi üçün subsidiyalar təqdim edilib. Taxıl istehsalına maddi yardım üçün hər ha əkin sahəsinə 40 manat təqdim edilib. Bu proses gələn il də davam etdiriləcək.
Bu tədbirlərin tətbiqi nəticəsində, Azərbaycanda kənd təsərrüfatının inkişafı sürətlənib. 2008 -ci ilin doqquz ayı ərzində ölkənin aqrar sektorunda 8,7 faiz artım buna dəlalət edir.
Hazırda ölkədə istehsal edilən kənd təsərrüfatı məhsullarının 99 faizi özəl sektorun payına düşür. Azərbaycanda torpaq islahatı faktiki olaraq başa çatdırılıb və 1390 ha torpaq sahəsi əvəzsiz olaraq kənd əhalisinə verilib.
Hökumət hesab edir ki, kəndlilərin dəstəklənməsi üçün ölkənin aqrar sektorunun hazırki ekstensiv inkişafı şəraitində, yaxın 10 ildə Azərbaycanda vergi güzəştlərinin ləğvi aktual deyil.
Parlamentarilər kənd təsərrüfatı məhsulları istehsalçıları üçün vergi tətillərinin uzadılmasının zəruriliyini təsdiq ediblər.
Noyabrın 14 - nə olan cari mübadilə məzənnəsi -- 0,8093 AZN/USD.
Müəlliflə əlaqə saxlamaq üçün elektron ünvan: [email protected]
