Azərbaycan, Bakı, 15 noyabr/ Trend , müxbir N.İsmayılova/ Maliyyə naziri Samir Şərifovun rəhbərlik etdiyi Azərbaycan nümayəndə heyəti iqtisadi əməkdaşlıq üzrə Azərbaycan-Amerika hökumətlərarası komissiyasının ikinci iclasında iştirak etmək üçün Vaşinqtona səfər edəcək. Bu barədə şənbə günü nazirlikdən bildiriblər.
İclas noyabrın 17-nə planlaşdırılıb. Komissiyanın həmsədrləri Azərbaycan tərəfindən Samir Şərifov, Amerika tərəfindən isə ABŞ Dövlət katibinin müavini Daniel Salivandır.
Görüşdə ticarət və investisiya əməkdaşlığı, informasiya texnologiyaları, Azərbaycan və ABŞ arasında enerji və nəqliyyat sahələrində əməkdaşlığın genişləndirilməsi məsələləri müzakirə olunacaq.
Görüşdə həmçinin, Amerikanın Beynəlxalq və Ticari İnkişaf Agentliyinin texniki dəstəyi ilə reallaşdırılan layihələrin icra vəziyyəti; yeni layihələrin maliyyələşdirilməsi imkanları; hüquq və qanunvericilik sahələrində birgə tədbirlər nəzərdən keçiriləcək.
Azərbaycan-Amerika iqtisadi komissiyasının ilk iclası 2007-ci il fevralın 7-də Bakıda keçirilib.
Amerika-Azərbaycan münasibətləri üç mühüm tərkibdən ibarətdir və onlardan biri təhlükəsizliyin təmin edilməsi - qlobal terrorçuluqla mübarizədir. İkincisi energetika sahəsində təhlükəsizliyin təmin edilməsindən ibarətdir. Bu məsələlər sonrakı görüşlər zamanı nəzərdən keçiriləcək. Üçüncü isə iqtisadiyyat və demokratiya sahəsində islahatlarla bağlıdır.
Komissiyanın ilk iclası zamanı müzakirələr məhz üçüncü istiqamətə yönəldilmişdi.
Azərbaycan iqtisadiyyatına yatırılan sərmayələrin ümumi həcminə görə, ABŞ (sərmayələrin xüsusi çəkisi 2008-ci ilin doqquz ayı ərzində 20 faiz, 2007-ci ilin yekunu üzrə isə 23,9 faiz təşkil edib) lider mövqelərdən birini tutur. Azərbaycana yatırılan Amerika sərmayələrinin ümumi həcmi 2007-ci ilin 653,73 milyonuna nisbətdə 345,7 milyon təşkil edib.
Amerika tərəfi hesab edir ki, ticarətin inkişafı da fəaliyyətin mühüm istiqamətlərindən biri olaraq qalmaqdadır, lakin gələcəkdə o, kommersiya istiqamətində də davam etdiriləcək.
Məqalə müəllifi ilə əlaqə ünvanı - [email protected]
