Azərbaycan, Baku, 19 noyabr / Trend , müxbir Ü.İsmayılova/ "2009-cu ildə Azərbaycanda əmək təqaüdlərinin baza hissəsi 107-108 manatadək artırıla bilər", - Əhalinin Sosial Müdafiəsi Dövlət Fondunun (ƏSMDF) rəhbəri Səlim Müslümov Yeni Azərbaycan Partiyasının rəsmi saytında yerləşdirilən müsahibəsində deyib.
"2009-cu ildə sosial müdafiə fondunun büdcəsindən əmək təqaüdlərinin ödənilməsinə 2008-ci ildə olduğundan 24,4 faiz çox vəsait ayrılıb", - deyə Müslümov söyləyib.
Onun sözlərinə görə, əmək təqaüdlərinin sığortalanmış hissəsinin maliyyələşməsi üçün məbləğ 31 faiz artırılacaq.
2009-cu ildə ƏSMDF büdcəsində gəlirlər və məsrəflərin 1,775 mlrd. manat səviyyəsində olacağı nəzərdə tutulub ki, bu, cari ildə olduğundan 26,3 faiz çoxdur. Növbəti ildə fondun məsrəflərinin 93,5 faizinin əmək təqaüdlərinin ödənilməsinə ayrılacağı gözlənilir.
Əmək təqaüdlərinin baza hissəsinin artırılması üçün 1,210 mlrd. manat, sığortalanmış hissələrin maliyyələşməsi üçün 450 mln. manat tələb olunur.
2009-cu ildə əmək təqaüdçülərinin sayı 1,290 mln. nəfər olacaq.
Müəlliflə əlaqə ünvanı: [email protected]
