Azərbaycan, Bakı, 21 noyabr/ Trend , müxbir Ü.İsmayılova/ "Azərbaycanın dövlət sərhədlərindəki nəzarət - buraxılış məntəqələrində mal və nəqliyyat vasitələrinin yoxlanılması zamanı "vahid pəncərə" sisteminin tətbiqi nəqliyyat vasitələrinin hərəkətini və mal dövriyyəsinin artımını sürətləndirəcək", - Dövlət Gömrük Komitəsinin rəhbəri Aydın Əliyev cümə günü bildirib.
"Gömrük Komitəsi nəzdində 2009 - cu il yanvarın 1-dən bu sistemin tətbiqinə hazırlıq üçün artıq xüsusi komissiya yaradılıb", - Əliyev vurğulayıb.
Onun sözlərinə görə, sistem hazırlanarkən, çox sayda ölkənin, o cümlədən də ilk olaraq gömrük məntəqələrində "vahid pəncərə" sistemini tətbiq etmiş ABŞ - ın təcrübəsindən istifadə edilib. Gürcüstan və Qazaxıstan da bu ölkənin təcrübəsindən istifadə edir.
Azərbaycan prezidenti İlham Əliyev 2009 - cu il yanvarın 1-dən dövlət sərhdələrinin nəzarət - buraxılış məntəqələrində mal və nəqliyyat vasitələrinə baxış zamanı "vahid pəncərə" prinsipinin tətbiqi haqqında fərman verib. "İpək Yolu" və "Şimal - Cənub" nəqliyyat dəhlizinin Azərbaycanın vacib bir hissəsi olduğunu nəzərə alaraq, dövlət sərhədlərinin buraxılış gücünün artırılması son dərəcə mühüm əhəmiyyət kəsb edir.
Malların və nəqliyyat vasitələrinin yoxlanılması zamanı süni maneələrin aradan qaldırılması, idxal - ixrac əməliyyatlarının müasir tələblərə uyğun aparılması üçün "vahid pəncərə" prinsipinin tətbiqi Azərbaycan Dövlət Gömrük Komitəsinə həvalə edilib.
Müəlliflə əlaqə saxlamaq üçün elektron ünvan: [email protected]
