Azərbaycan, Bakı, 21 noyabr/ Trend , müxbir N.İsmayılova/ Cümə günü Bakıda MDB - yə üzv dövlətlərin vergi xidmətləri rəhbərləri Koordinasiya Şurasının XV iclası keçirilib.
Görüşdə 2008 - ci il iş planının icrasının vəziyyəti, Birlik ölkələrinin vergi qanunvericiliklərinə dəyişikliklərin monitorinqi, vergi inzibatçılığının tənzimlənməsi məsələləri müzakirə edilib. Vergi ödəyicilərinin qeydiyyatı və ikiqat vergitutmanın aradan qaldırılması və s. sahələrdə təcrübə mübadiləsi də aparılıb.
"İclasda nəzərdən keçirdiyimiz vəzifələrin həlli MDB - yə üzv ölkələrin iqtisadiyyatına əməli fayda gətirməlidir", - Azərbaycanın vergilər nazirinin müavini Natiq Qasımov bildirib.
Vergilər Nazirliyi yanında ictimaiyyətlə əlaqələr şöbəsinin rəhbəri Fariz Məmmədovun sözlərinə görə, Şuranın əsas vəzifəsi Birliyə üzv dövlətlər arasında əməkdaşlığın möhkəmləndirilməsidir və iclasın gündəliyinə daxil edilmiş məsələlərin bu kontekstdə müzakirəsi böyük əhəmiyyət kəsb edir.
Görüşdə Rusiya, Ukrayna, Belarus, Qazaxıstan, Qırğızıstan, Moldova, Tacikistan, həmçinin Baltika ölkələrinin vergi orqanlarının nümayəndələri iştirak ediblər.
Qonaqlar Vergilər Nazirliyi yanında Xüsusi Rejimli Vergi Xidməti Departamentinə baş çəkib və burada "vahid pəncərə"nin iş prinsipi ilə tanış olublar.
Koordinasiya Şurası MDB - yə üzv dövlət başçılarının 2001 - ci il 31 may tarixli qərarı ilə yaradılıb. Onun əsas vəzifəsi Birlik ölkələri vergi xidmətlərinin fəaliyyətinin koordinasiyasına şərait yaradılmasıdır.
Müəlliflə əlaqə saxlamaq üçün elektron ünvan: [email protected]
