Ukrayna, Kiyev, 26 noyabr / Trend , müxbir Z.Novosvitski/ Ukrayna hökuməti büdcə kəsirinin ödənməsi üçün Dünya Bankı (DB) ilə 3 mlrd. qriven məbləğində (400 mln. dollardan çox) 30 illik kredit ayrılması barədə razılaşma imzalayıb, - çərşənbə günü Ukraynanın Baş naziri Yuliya Timoşenko Nazirlər Kabinetinin iclasında deyib. Məlumatı UNİAN yayıb.
"Bu, hökumətin dövlət büdcəsinin kəsirinin ödənməsi üçün cəlb etdiyi ən yaxşı borclanmadır. Çünki bu pullar illik 5 faizlə və 30 il müddətinə verilir", - o söyləyib.
Baş nazirin sözlərinə görə, belə güzəştli şərtlərlə kreditin cəlb olunması onu bildirir ki, dövlət büdcəsinin kəsiri "normal ödənir" və Dünya Bankı ilə uğurlu əməkdaşlıq aparılır.
"Bu kredit ehtiyatları büdcə siyasətini, büdcə xərclərinin maliyyələşməsini sabitləşdirməyə və kəsiri ödəməyə imkan verir", - hökumət başçısı bildirib.
Dünya Bankı əvvəllər bəyan edib ki, xüsusən bank sahəsində vəziyyətin normallaşması üçün, Ukrayna ilə əməkdaşlığı fəallaşdırmaq niyyətindədir.
Müəlliflə əlaqə ünvanı: [email protected]
