Azərbaycan, Bakı, 04 dekabr/ Trend , müxbir N.İsmayılova/Avropa Yenidənqurma və İnkişaf Bankı (AYİB) Bank Respublika ilə ipoteka kreditləşdirməsi üçün 10 mln. dollar vəsaitin ayrılması barədə müqavilə imzalayıb. AYİB Bank Respublika üçün müəyyən edilmiş mövcud ticarətin maliyyələşdirilməsi limitinin həcmini 3.5 milyon dollardan 6 milyon dollaradək genişləndirib. [Azərbaycan bankı AYİB-in ticarət maliyyələşdirməsi proqramına hələ 2005-ci ildə qoşulub.]
AYİB-in ekspertlərinin rəyinə görə, Azərbaycanın ipoteka bazarı inkişafın erkən mərhələsindədir və xüsusilə də uzunmüddətli maliyyə vəsaitlərinin əldə edilməsi mürəkkəb prosesdir. Eyni zamanda, yaşayış binalarının tikintisi davamlı inkişaf edir və xüsusiən də Bakı, Sumqayıt və Gəncə kimi üç ən iri şəhərdə mənzil tikintisinə tələbat durmadan artır. Nəticədə, ipoteka kreditləri üçün tələbat bankların maliyyələşdirməni təmin etmək imkanını üstələyir.
Bank Respublika AYİB tərəfindən ayrılan kreditin hesabına bu davamsızlığı azaltmağa imkan verəcək. AYİB-in texniki dəstəyi ilə Bank Respublikada prosedurlar təkmilləşdiriləcək və məsləhət xidmətləri göstəriləcək.
"AYİB-in kredit ehtiyatları, Bank Respublika-nın uzunmüddətli maliyyələşdirilməsinin təmin edilməsi ilə yanaşı, şəxsi ipoteka kreditləşdirməsinin inkişafında mövcud maneələrin aradan qaldırılmasına imkan verəcək, - AYİB-in Bakı nümayəndəliyinin rəhbəri Frensis Deley bildirib. - Bu isə banka, öz müştərilərinə ipotekanı daha cəlbedici edəcək uzunmüddətli maliyyə vəsaitləri təklif etməyə imkan verəcək".
Bank Respublika-nın İdarə Heyətinin sədri Xədicə Həsənova hesab edir ki, AYİB-lə əməkdaşlıq Azərbaycanda ipoteka kreditləri ilə bağlı fəaliyyətin gücləndirilməsinə yardım etməklə, özəl ipoteka kreditləri üzrə fəaliyyətləri stimullaşdıracaq və ölkədə ev tikintisi bazarının daha da inkişafına kömək edəcək.
Bank Respublika aktivlərin həcminə görə Azərbaycanda beşinci ən böyük bankdır. Bank, 2004 - cü ildə ilk dəfə kiçik və orta sahibkarlığın inkişaf etdirilməsini nəzərdə tutan multibank maliyyələşdirməsi mexanizminə qoşulduqdan sonra AYİB-in tərəfdaşı olub. Növbəti illərdə bank AYİB-dən mikro, kiçik və orta sahibkarlığın inkişafının dəstəklənməsinə kreditlər alıb.
Bu gün AYİB Azərbaycanda doqquz kommersiya bankı ilə işləyir və onlara ümumillikdə 180 mln. dollara yaxın kredit təqdim edib.
Müəlliflə əlaqə saxlamaq üçün elektron ünvan: [email protected]
