Azərbaycan, Bakı, 13 dekabr/ Trend , müxbir Ü.İsmayılova/ Bakının ilkin daşınmaz əmlak bazarında yaşayış sahəsinin bir kvadrat metrinin orta qiyməti noyabrda 2,9 faiz azalaraq 1167 dollara çatıb. Bu barədə şənbə günü "Əmlak bazarı iştirakçıları" İctimai Birliyindən məlumat verilib. Oktyabrda ilkin bazarda mənzilin bir kvadrat metrinin qiyməti 1202 dollar təşkil edib.
Noyabrda ilkin bazarda mənzil sahələrinin orta göstəricisi 120,2 kvadrat metr təşkil edib ki, bu da oktyabra (120 kvadrat metr) nisbətdə 0,08 faiz azdır. Tikilən evlərdə girişlərin orta göstəricisi 2-3, orta mərtəbə göstəricisi isə 15,1 təşkil edib.
Ən çox yeni tikili Bakının Yasamal rayonu ərazisində aparılıb, tikilən obyektlərin sayına görə ikinci yerdə Nəsimi rayonu, üçüncü yerdə isə Xətai rayonu qərarlaşıb. Üç rayon üzrə tikintisi aparılan yeni binaların ümumi tikinti portfelindəki payı 67,3% təşkil edir.
Noyabrda qiymət artımı Xətai rayonunda 1,2 faiz, Yasamalda 0,4 faiz, Səbaildə 1,2 faiz, Nərimanovda 0,9 faiz, Nizamidə 0,3 faiz, Suraxanıda 4,3 faiz təşkil edib. Bakının digər rayonlarında isə qiymətlər stabil qalıb.
İctimai Birliyin apardığı monitorinqin yekunlarına əsasən, noyabrda Bakıda 567 binanın tikintisi davam etdirilib. Tikinti işlərini 212 tikinti şirkəti həyata keçirib.
Məqalə müəllifi ilə əlaqə ünvanı: [email protected]