Azərbaycan, Bakı, 18 dekabr/ Trend , müxbir Ü.İsmayılova/ 2009-cu ilin birinci rübündə Azərbaycanda artıq ilk sertifikatlı qiymətləndiricilər yaranacaq. Bu barədə cümə axşamı, Azərbaycan və Mərkəzi Asiyada ipoteka kreditləşdirməsinin inkişafı proqramı çərçivəsində qiymətləndirmə fəaliyyəti üzrə işçi qrupunun üçüncü görüşündə bəyan edilib.
Görüşdə diqqət üç əsas məsələdə cəmləşdirilib - qiymətləndiricilərin sertifikatlaşdırılmasının tətbiqi, qanunverici bazaya dəyişiklik və əlavələrin edilməsi və əmlakın qiymətləndirilməsinin milli standartlarının qəbul edilməsi. İclasda Qiymətləndiricilər Birliyi İdarə Heyətinin üzvləri, BMK-nın qiymətləndirmə fəaliyyəti üzrə məsləhətçisi İqor Artyomkin iştirak ediblər.
İşçi qrupu fevralın 15-dək qiymətləndiricilərin sınaq sertifikatlaşdırılmasının aparılması barədə qərar qəbul edib. Birinci mərhələdə qiymətləndiricilərin sertifikatlaşdırılması üçün imtahanları Qiymətləndiricilər Birliyi yanında xüsusi qrup aparacaq.
"Başlanğıc mərhələdə real sertifikatlaşdırma birlik tərəfindən keçiriləcək, Gələcəkdə isə, bu proses xüsusi orqan tərəfindən aparıla bilər", - Artyomkin deyib.
İclasda Azərbaycan hökumətinə qiymətləndirmə fəaliyyəti haqqında qanunverici bazaya dəyişiklik və əlavələrin edilməsi üzrə təkliflərin təqdim edilməsi planları qeyd edilib.
Əmlakın qiymətləndirilməsinin milli standartlarının işlənilməsi məsələsinə toxunan iclas iştirakçıları artıq beynəlxalq normalara uyğun hazırlanmış doqquz standartın təkmilləşdirilməsinin zəruri olması qərarına gəliblər.
Azərbaycanın Qiymətləndiricilər Birliyi 1997-ci ildə qeydiyyatdan keçib.
Azərbaycanda qiymətləndirmə fəaliyyəti 1995-ci ildə qəbul edilmiş "Qiymətləndirmə fəaliyyəti haqqında" Qanunla tənzimlənir.
Müəlliflə əlaqə saxlamaq üçün elektron ünvan: [email protected]
