Azərbaycan, Bakı, 14 yanvar/ Trend , müxbirlər İ.Xəlilova, N.İsmayılova/ "Dünya böhranı Azərbaycan banklarının aktivləri və səhmlərinin gəlirliliyinin azalmasına gətirməyib", - Azərbaycanın Qiymətli Kağızlar üzrə Dövlət Komitəsinin (QKDK) sədri Rüfət Aslanlı çərşənbə günü bildirib.
Onun sözlərinə görə, " onların gəlirliliyi ilin əvvəlində müşahidə olunan səviyyədə qalır".
Bu gün bank sektorunda minoritar səhmdarlar qismində, əsasən, bu sahədə kifayət qədər təcrübəsi olan xarici sərmayədarlar çıxış edir.
Aslanlı vurğulayıb ki, bu gün Azərbaycanda səhmləri ilə azad alqı-satqı əməliyyatlarının aparıldığı şirkətlər yoxdur. Əksər halarda bu səhmdar cəmiyyətləri özəlləşdirmə prosesində yaradılıb və onlar majoritar səhmdarlar tərəfindən idarə olunurlar.
"Bütün dünyada analoji proses baş verir və majoritar səhmdarların səhmlərinin parçalanması üçün kifayət qədər çox vaxt tələb olunur. Bununla əlaqədar, dünya böhranı Azərbaycanın səhm bazarına təsir göstərməyib", - QKDK-nin rəhbəri bildirib.
"Hətta ən inkişaf etmiş ölkələrdə qiymətli kağızlarla birja və birjadankənar ticarət mövcuddur, eləcə də mütəşəkkil ticarət şəbəkələri yaradılır. Azərbaycanda fond bazarının müəyyən inkişaf mərhələsində bütün bu seqmentlərin yaradılması qaçılmazdır", - Aslanlı bildirib.
Azərbaycanda belə seqmentləşdirmə, ilk növbədə, valyuta bazarında müşahidə olunub. Bakı Banklararası Valyuta Birjası yaradılarkən ticarət əməliyyatları bu birjada vasitəsilə hərraclar yolu ilə aparılırdı. Bu gün valyuta birjası vasitəsilə ticarət həcmi azalıb;mütəşəkkil və qeyri - mütəşəkkil bazarlar yaradılıb. Analoji vəziyyət fond bazarında da müşahidə olunur, - Aslanlı əlavə edib.
Müəlliflə əlaqə saxlamaq üçün elektron ünvan: [email protected]
