Türkmənistan, Aşqabad, 22 yanvar/ Trend , müxbir E.Həsənov/
Türkmənistanın avtomobil yollarında körpülərin salınması Türkiyədən olan Yapi we Tijaret Limited Sirketi türk şirkətinə və Birtaniyada qeydiyyatdan keçmiş Garanti Koza LLP-yə həvalə olunub, - "Türkmənavtoelları" (Türkmən avtomobil yolları) Dövlət Korporasiyası xəbər verir.
Türkiyə firması ümumi dəyəri 287,5 mln. dollar olan 90 körpünün salınmasını üzərinə götürüb. Müqaviləyə əsasən, Aşqabad - Türkmənbaşı yolunun Ərçman -Türkmənbaşı sahəsində 31 körpünün, Aşqabad - Marı yolunun Anau - Marı sahəsində 30, Türkmənabad - Fərab yolunda 20 körpünün, Aşqabad - Qaraqum - Daşoğuz avtomobil yolunda 9 körpünün salınması nəzərdə tutulub.
Garanti Koza LLP artıq Marı -Türkmənabad avtomobil yolunda ümumi dəyəri 100 mln. dollar olan 28 körpünün salınması layihəsinin tərtibi və işlərin həyata keçirilməsi müqaviləsini icra edir. Hər iki layihə Türkmənistan prezidenti Qurbanqulu Berdiməhəmmədov tərəfindən təsdiq olunub.
Son illərdə Türkmənistan ölkənin artan ticarət - iqtisadi əməkdaşlığı sayəsində çoxalmış beynəlxalq yük daşınmalarının cəlb edilməsi üçün fəal addımlar atır. Bir müddət əvvəl Aşqabad respublikanı İran və Qazaxıstanda nəqliyyat kommunikasiyaları ilə birləşdirəcək dəmir yolu xəttinin çəkilişinə başlayıb.
Müəlliflə əlaqə saxlamaq üçün elektron ünvan: [email protected]
