Azərbaycan, Bakı, 26 yanvar/ Trend , müxbir İ.Xəlilova/
Dünya Bankı Bakıda Nəqliyyatın idarə edilməsi mərkəzinin yaradılması layihəsinin texniki-iqtisadi əsaslandırması üçün 900 min dollar məbləğində qrant ayırıb, - ölkənin Nəqliyyat Nazirliyindən bazar ertəsi bildiriblər.
Bu tədbirlər paytaxt nəqliyyatının idarə edilməsi sisteminin təkmilləşdirilməsi proqramı çərçivəsində aparılır. Nəqliyyatın hərəkət istiqamətlərinin identifikasiyasının əsas məsələləri üzrə araşdırmalar DB-nin məsləhətçisi Riçard Podolskinin rəhbərlik etdiyi xüsusi qrup tərəfindən aparılır.
"İşlər yayın ortalarında başa çatdırılacaq", - DB-nin Bakı nümayəndəliyindən bazar ertəsi bildiriblər.
Araşdırmalar başa çatdıqdan sonra layihə hazırlanacaq. O, Cənubi Koreyanın SK C&C şirkətinin hazırladığı nəqliyyatın intellektual idarə edilməsi sisteminin yaradılması layihəsindən daha geniş ola bilər. DB-nin layihəsi yeraltı nəqliyyat (metro), parkinq və s. bəzi elementləri özündə birləşdirə bilər.
Bakıda nəqliyyatın intellektual idarə edilməsi mərkəzinin tikintisinin martda başlayacağı gözlənilir. İlkin olaraq onun dəyəri 76 mln. dollar qiymətləndirilir və vergilər nəzərə alınmadan 62-63 mln. dollar təşkil edəcək.
Nəqliyyatın intellektual idarə edilməsi mərkəzinin binası Heydər Əliyev prospektində, keçmiş Keşlə Maşınqayırma Zavodunun ərazisində yerləşəcək.
Layihənin realizəsinin vacibliyi ondan ibarətdir ki, bu sistem insanlara nəqliyyatda vaxt itkisini daha da azaltmağa, hərəkəti nizama salmağa, nəqliyyat sistemində gərginliyi boşaltmağa imkan verəcək.
Nəqliyyat Nazirliyi ilə imzalanan sazişə əsasən, Bakıda, Seulda Şəhər Nəqliyyatı Mərkəzinə analoq olan Nəzarət Mərkəzi (dispetçerizasiya) yaradılacaq.
SK C&C artıq öz nümayəndəliyini Azərbaycanda qeydiyyatdan keçirib. Hazırda şirkət layihənin ətraflı layihələndirilməsini hazırlayır. Birinci mərhələdə mərkəz Bakını, perspektivdə isə Abşeron yarımadasını əhatə edəcək. Ətraflardakı qovşaq nöqtələrində, fibriooptik kommunikasiya sistemləri çıxışları hesabına mərkəzin təsiri Abşeron, Xırdalan, Sumqayıt və Gəncəyə genişləndiriləcək. O, həmçinin şəhərətrafı və şəhərlərarası daşınmalarla əlaqədə olacaq ki, bu da elektron biletlər sisteminə keçməyə imkan verəcək.
Araşdırmalara əsasən, belə sistemin tətbiqi nəticəsində işıqfor və avtobus dayanacaqlarının sayı nizamlanacaq. Körpü və piyada keçidlərinin tikintisi nəticəsində onların sayı onsuz da azalıb. Bu sistemin yaradılması avtonəqliyyat vasitələrinin hərəkəti, sürəti, dayanacaqlar, nəqliyyat qəzaları, tıxaclar haqda mərkəzi dispetçer məntəqəsinə operativ məlumat göndərməyə imkan verəcək.
Nəqliyyatın intellektual idarəsi sisteminin iki mərhələdə, 3 və ya 5 il ərzində yaradılması nəzərdə tutulur.
Müəlliflə əlaqə saxlamaq üçün elektron ünvan: [email protected]
