Azərbaycan, Bakı, 30 mart / Trend , müxbir Ü.İsmayılova /
BMT İnkişaf Proqramının təşkil etdiyi "Keçid dövrü: inkişaf problemləri" beynəlxalq forumu zamanı Azərbaycanda həyata keçirilən təqaüd islahatlarının təqdimatı keçiriləcək. Afinada keçiriləcək forumda Azərbaycanı Əhalinin Sosial Müdafiəsi Fondunun başçısı Səlim Müslümov təmsil edəcək.
Azərbaycandakı təqaüd islahatlarının təqdimatı sabah, forumun ilk günü baş tutacaq.
Forumda həmçinin BMT Baş katibinin müavini, BMT-nin MDB və Avropa ölkələri üzrə regional direktoru Kori Udoviçki, eləcə də BMT və Dünya Bankının digər nümayəndələri, Yunanıstan hökumətinin nümayəndələri, o cümlədən Şərqi Avropa və Orta Asiyadan qonaqlar iştirak edəcəklər.
Azərbaycan təqaüd sığorta sistemi modeli beynəlxalq maliyyə təşkilatları tərəfindən yüksək qiymətləndirilir. Azərbaycan 2004-cü ildən Sosial Təminat Beynəlxalq Assosiasiyasının üzvüdür. 2007-ci ildən isə ölkə Assosiasiyanın Avropa Komissiyasının Avropa dövlətləri ilə eyni səviyyəli üzvüdür və müxtəlif qərarların qəbulunda vacib rol oynayır.
Hazırda Azərbaycanda bu sahədəki islahatların davamını nəzərdə tutan 2009-2015-ci illər təqaüd sığorta sistemi üzrə dövlət proqramı həyata keçirilir.
Məqalə müəllifi ilə əlaqə ünvanı: [email protected]