Azərbaycan, Bakı, 07 aprel / Trend , müxbir İ.Xəlilova /
2009-cu il martın 2-29-u aralığında Azərbaycan Vergilər Nazirliyi tərəfindən keçirilmiş operativ nəzarət tədbirləri nəticəsində 683 vergi ödəyicisində qanunvericiliyin pozulması faktı aşkar edilmiş və müvafiq tədbirlər görülmüşdür.
Araşdırmalar müddətində 328 vergi ödəyicisində nağd hesablaşmaların aparılması qaydalarının pozulması, 78 vergi ödəyicisində valyuta sərvətlərinin ödəniş vasitəsi kimi qəbul edilməsi faktları aşkar edilib. Keçirilən tədbirlər zamanı vergi orqanlarında qeydiyyata durmadan fəaliyyət göstərən 34 vergi ödəyicisi aşkar edilib, 145 vergi ödəyicisinin xüsusi razılıq (lisenziya) tələb olunan fəaliyyət növləri ilə razılıq (lisenziya) olmadan məşgul olması faktları müəyyən edilib.
Vergi orqanlarının həyata keçirdiyi operativ nəzarət tədbirləri zamanı 26 vergi ödəyicisində 29 nəfər fiziki şəxsin əmək müqaviləsi bağlamadan işə cəlb edilməsi, 28 vergi ödəyicisinin fərqlənmə nişanı olmadan avtomobil nəqliyyatı ilə sərnişin daşıması, 18 şəxs tərəfindən valyuta sərvətlərinin ictimai yerlərdə alınıb-satılması faktları aşkar olunub.
Aksiz markalarının tətbiqi vəziyyətinə nəzarət məqsədilə keçirilən tədbirlər zamanı isə 11 vergi ödəyicisində 386.5 manat dəyərində 88 ədəd aksiz markaları ilə müvafiq qaydada markalanmamış mallar aşkar edilib.
Aprelin 07-nə olan rəsmi məzənnə 0,8029 AZN/USD təşkil edir.
Məqalə müəllifi ilə əlaqə ünvanı: [email protected]
