Azərbaycan, Bakı, 09 aprel / Trend , müxbir Ü.İsmayılova /
"Azərbaycan Sığortaçılar Assosasiyası Türkiyə İnkişaf və Əməkdaşlıq İdarəsi (TİKA) ilə birlikdə Azərbaycan sığortaçıları üçün giriş kursu keçirməyə hazırlaşır", - cümə axşamı Assosasiyanın icraçı direktoru Qafar Məcidov deyib.
"Giriş kursunu mayın 25-də başlamaq planlaşdırılır", - Məcidov bildirib.
Onun sözlərinə görə, tədris bütün mövcud sığorta növləri üzrə həyata keçiriləcək.
Dərsləri Türkiyə Sığorta İnstitutundan üç pedaqoq aparacaq. Kursun müddəti bir aydır (110 saat). Dərslər üçün 500-600 manat civarında ödəmə edilməlidir.
Məcidov deyib ki, bu kursu uğurla keçən sığortaçılar təhsilini Türkiyə Sığorta İnstitutunda davam etdirə biləcək. Bu institutun sertifikatı London Sığorta İnstitutu tərəfindən tanınıb.
"Assosiasiya belə sığortaçıları dəstəkləyəcək", - Məcidov deyib.
Bir sıra ölkələrdə TİKA müxtəlif humanitar-sosial, kommunikasiya, mədəni layihə və proqramlarla təmsil olunub ki, onlar da ümumilikdə Türkiyəyə və onun siyasətinə yerli əhalinin müsbət və dost münasibətinin formalaşdırılmasında böyük əhəmiyyət daşıyır.
Azərbaycan Sığortaçılar Assosasiyası 2006-cı ilin dekabrında təsis edilib və ölkədə fəaliyyət göstərən bütün sığorta şirkətləri ona daxildir.
Məqalə müəllifi ilə əlaqə ünvanı: [email protected]