Azərbaycan, Bakı, 13 may / Trend , müxbir Ü.İsmayılova /
Azərbaycan Dövlət Gömrük Komitəsində sərhəd-buraxılış məntəqələrində mal və nəqliyyat vasitələrinə baxış zamanı "vahid pəncərə" sistemi çərçivəsində tətbiq ediləcək elektron texnologiyaların təqdimat mərasimi keçirilib. Bu barədə idarənin rəsmi qəzetində məlumat verilir.
Komitənin Statistika və İnformasiya Texnologiyaları Şöbəsinin müdiri İqbal Babayev təqdimat zamanı bildirib ki, texnologiyaların tətbiqi ilə müasir standartlar üzrə idxal-ixrac əməliyyatlarının aparılması üçün şərait yaranacaq, vaxta qənaət olunacaq, təkrar yoxlamalar aradan qaldırılacaq.
"Vahid pəncərə" sistemi nəzarət-buraxılış məntəqəsini keçən zaman (Nəqliyyatın qeydiyyatı, gömrük nəzarəti (sanitar-karantin, fitosanitar, baytarlıq), yol vergisinin ödənməsi, icazə üçün blankların alınması, daşınma cədvəlinin qeydiyyatı) bütün işlərin bir mərhələdə reallaşdırılması üçün şərait yaradır.
Azərbaycan Dövlət Gömrük Komitəsi Azərbaycan Prezidentinin 2008-ci il 11 noyabr tarixli fərmanına əsasən, 2009-cu il 1 yanvar tarixindən "vahid pəncərə" prinsipi üzrə fəaliyyət göstərir.
Komitə rəhbəri Aydın Əliyev bildirmişdi ki, bu prinsipə keçid nəzarət-buraxılış məntəqələrindən keçid müddətinin bir neçə saatdan 20 dəqiqəyədək azalmasına imkan yaradacaq.
Məqalə müəllifii ilə əlaqə ünvanı - [email protected]
