Azərbaycan, Bakı, 14 may / Trend , müxbir Ü.İsmayılova /
Azərbaycanın Daşınmaz Əmlakın Dövlət Reyestri Xidmətinin (DƏDRX) administrativ binasında ölkə ərazisində daşınmaz əmlakın hər obyekti üzrə vahid elektron məlumat bazası yaradılacaq. Bu barədə cümə axşamı "Şərqi Avropa və Mərkəzi Asiyada milli məkanın infrastrukturunun inkişafı" beynəlxalq seminarında dövlət xidmətinin başçısı Arif Qaraşov deyib.
"Hazırda ölkədə elektron hökumətin yaradılması proqramı reallaşdırılır və daşınmaz əmlak sahəsində milli məkan infrastrukturu onun vacib elementlərindən olacaq", - Qaraşov qeyd edib.
Onun sözlərinə əsasən, daşınmaz əmlak sahəsində sözügedən infrastrukturun tətbiqi əmlakın qeydiyyatında şəffaflığı təmin edəcək və qeydiyyat üçün ayrılan vaxtı minimum həddə endirəcək.
2008-ci ildən etibarən Rabitə və İnformasiya Texnologiyaları Nazirliyi Azərbaycanda 30 milyon dollara başa gələn elektron hakimiyyət yaradılması proqramının reallaşdırılmasına başlayıb.
Ensiklopedik məlumatlarda deyilir ki, elektron hökumət informasiya və artıq formalaşmış dövlət xidmətlərinin vətəndaşlara, biznes sahəsinə, digər dövlət orqanlarına və dövlət məmurlarına çatdırılarkən dövlətlə vətəndaş arasında qaşılıqlı əlaqənin minimuma endirilməsi, informasiya texnologiyalarının isə maksimum istifadəsi deməkdir.
Elektron hökumət ənənəvi hakimiyyətin əlavəsi və ya analoqu olmamaqla informasiya-kommunikasiya texnologiyaları bazasında aktiv istifadə etməklə yeni qarşılıqlı əlaqə metodunu müəyyən edir.
Ölkənin hər bir dövlət orqanında yaradılacaq vahid elektron sistem hər bir obyekt üzrə vahid elektron məlumat bazasının yaradılmasına imkan verəcək. Qaraşovun sözlərinə əsasən, bu sistem dövlət orqanları tərəfindən də informasiyanın əldə edilməsinin effektini artıracaq və natorial kontorlar tərəfindən obyektlərin qeydiyyat proseduru işini əhəmiyyətli dərəcədə sadələşdirəcək.
Hazırda DƏDRX Dünya Bankı (DB) ilə "Daşınmaz əmlakın qeydiyyatı" birgə layihəsi çərçivəsində bütünlüklə ölkə ərazisini əhatə edən kadastr məlumatları daşıyan rəqəmli karta malikdir. Sözügedən kart mütəmadi olaraq təkmilləşdirilir.
"Düşünürəm ki, 2013-ci ilədək Azərbaycanın hər daşınmaz əmlakına dair daha geniş rəqəmli kadastr kartlara sahib olacağıq", - Qaraşov əlavə edib.
Azərbaycan Hökuməti və DB 2007-ci ilin iyulunda daşınmaz əmlakın vahid kadastrı sistemini birgə tətbiq etmək haqqında saziş imzalayıb. Layihə dörd komponentdən ibarətdir: daşınmaz əmlakın qeydiyyatı; dövlət əmlakının idarə edilməsi və reyestri; baza xəritəçəkmə və torpaq kadastrı; treninqlər, siyasətin formalaşdırılması və layihənin idarə edilməsi.
Layihənin dəyəri 38,57 mln. dollar təşkil edir. Bunun 30 mln. dolları DB-nin kreditinin payına düşür. Kredit ehtiyatları beş il güzəştli dövr olmaqla 20 il müddətinə ayrılıb.
Məqalə müəllifi ilə əlaqə ünvanı: [email protected]
