Azərbaycan, Bakı, 20 iyun / Trend , müxbir Ü.İsmayılova / "Sorğular göstərdi ki, turizm obyektlərində qiymətlər göstərilən xidmətlərin səviyyəsindən artıqdır", - "Xalq" qəzetinə müsahibəsində Azərbaycanın Mədəniyyət və Turizm Nazirliyinin turizm sektorunun başçısı Aydın İsmiyev deyib. "Hazırkı qanunvericiliyə uyğun olaraq, Turizm Nazirliyi turizm obyektlərinin tarif siyasətinə qarışmır", - İsmiyev bildirib. Onun sözlərinə görə, buna baxmayaraq, hazırda nazirlik göstərilən xidmətlərin qiymətlərinin uyğunlaşdırılması üzrə işlər aparır. İsmiyevin sözlərinə görə, nazirlik göstərilən xidmətlərin qiymətləndirilməsi və səviyyəsinin yoxlanılması, qidalanmanın səviyyəsinin öyrənilməsi, sanitariya və gigiyena qaydalarına riayət edilməsi, turistlərin təhlükəsizliyinin təminatı üzrə ölkənin şimal, şimal-qərb, qərb və cənub regionlarında monitorinqlərə hazırlıq üzrə işlər aparır. "Azərbaycanda turistlərin yay istirahətini yüksək səviyyədə keçirməsinin təminatı üzrə bütün imkanlardan səmərəli şəkildə istifadə edilir", - İsmiyev bildirib.
...
