Azərbaycan, Bakı, 22 iyun / Trend , müxbir E.İsmayılov /
İyulun əvvəlində Rumıniyanın iqtisadiyyat naziri Adrian Videanu nümayəndə heyəti ilə birlikdə Bakıya rəsmi səfər edəcək, bazar ertəsi Rumıniyanın Azərbaycandakı səfirliyindən bildiriblər.
İyulun 1-dən 3-dək davam edəcək rəsmi səfər çərçivəsində Videanunun həmsədrlik edəcəyi ticarət-iqtisadiyyat və elmi-texniki əməkdaşlıq üzrə Azərbaycan-Rumıniya hökumətlərarası komissiyanın iclası keçiriləcək.
Səfirlik nümayəndə heyətinin tərkibi və səfərin gündəliyi barədə məlumat verməyib.
Rumıniya XİN-in strateji məsələlər üzrə dövlət katibi Boqdan Auresku bir müddət əvvəl Azərbaycana etdiyi səfərində bildirib ki, iclas zamanı birgə həyata keçirilən layihələr, o cümlədən bütün sferalarda ikitərəfli münasibətlərin inkişaf etdirilməsi məsələləri müzakirə ediləcək. Dövlət katibinin sözlərinə görə, Azərbaycan Prezidentinin Rumıniyaya səfəri zamanı imzalanacaq sənədlər nəzərdən keçiriləcək.
"Ümid edirəm ki, Azərbaycan Prezidenti İlham Əliyev payızda Rumıniyaya səfər edəcək. Bu, ölkələr arasında strateji əməkdaşlığı gücləndirmək üçün yaxşı imkan olacaq", - Auresku bildirib. - Rumıniya və Azərbaycan arasında əməkdaşlıq yüksək səviyyədə - strateji əməkdaşlıq səviyyəsindədir".
"Biz strateji əməkdaşlığa çox yaxınıq. Bu çərçivədə yüksək səviyyəli görüşlərin keçirilməsi zəruridir. Azərbaycan və Rumıniya prezidentləri arasında yaxşı münasibətlər mövcuddur", - Rumıniya XİN-in dövlət katibi bildirib.
Hökumətlərarası komissiya çərçivəsində iki ölkənin maliyyə-bank institutları arasında münasibətlər qurulub. Rumıniyanın EximBank və Azərbaycanın Beynəlxalq Bankı arasında bağlanmış müqavilə hər iki ölkədə məhsulların və xidmətlərin ixracının sığortalanması və zəmanət dəstəyinin göstərilməsini, o cümlədən məhsul və xidmətlər təminatını nəzərdə tutur.
Ölkələr arasında normativ-hüquqi baza müxtəlif sahələrdə 50-dən artıq müqaviləni nəzərdə tutur.
2009-cu ilin yanvar-aprelində Azərbaycan və Rumıniya arasında ticarət dövriyyəsi 54,6 milyon dollar təşkil edib. 2008-ci il ərzində ticarət dövriyyəsi 193 milyon dollar təşkil edib.
Məqalə müəllifi ilə əlaqə ünvanı: [email protected]
