Azərbaycan, Bakı, 25 iyun / Trend , müxbir Ü.İsmayılova /
Azərbaycan Mərkəzi Bankı nəzdində fəaliyyət göstərən İpoteka Fondunun (AİF) istiqrazlarının ilk tranşının yerləşdirilməsində maliyyə təşkilatları, banklar və sığorta şirkətləri iştirak ediblər. Bu barədə cümə axşamı AİF-dən bildiriblər.
"İlk tranşın yerləşdirilməsi Azərbaycanda ipoteka kreditləşdirilməsi prosesinin işə salınması üzrə nümunə aksiyasıdır. Gələcəkdə AİF istiqrazların yerləşdirilməsini davam etdirəcək", - deyə AİF nümayəndəsi deyib.
Onun sözlərinə görə, hələ ki, yerləşdirmə qüvvədə olan qanun üzrə aparılır. "İstiqrazların təmin edilməsi barədə yeni qanun qəbul olunacağı təqdirdə fond BMK ilə birgə hazırlanan yeni qanunlara əsasən işlər aparacaq", - AİF-dən bildirilib.
AİF 55 milyon manat məbləğində istiqraz yerləşdirib, ilk tranş 15 milyon manat təşkil edir. Fondun istiqrazların emissiya prospekti Qiymətli Kağızlar üzrə Dövlət Komitəsi tərəfindən mayın 29-da qeydiyyatdan keçib. Emissiyanın həcmi 55 milyon manat təşkil edir. Hər bir istiqrazın nominal dəyəri 1 000 manatdır. İpoteka istiqrazlarının qoyuluşu illik üç faiz təşkil edir. İstiqrazların ödənmə tarixi 2016-cı il mayın 10-na nəzərdə tutulub.
Məqalə müəllifi ilə əlaqə ünvanı: [email protected]
