Azərbaycan, Bakı, 08 iyul / Trend , müxbir N.İsmayılova /
Avstriya İnkişaf Bankı (OeEB) ilin sonuna qədər daha bir neçə Azərbaycan bankına maliyyə dəstəyi göstərməyə hazırdır. Bu barədə çərşənbə günü OeEB-in İcraçı Direktorlar Şurasının üzvü Andrea Haqman məlumat verib.
"Biz konsaltinq şirkətinə cəlb edilmişik. Bu şirkət artıq Azərbaycan bankları ilə əməkdaşlıq potensialını öyrənmək məqsədi ilə Azərbaycan bazarlarında araşdırmaya başlayıb. Yaxın zamanda araşdırmaların nəticələrinin alınması gözlənilir", - Haqman deyib.
Onun sözlərinə görə, bu il daha bir və ya iki Azərbaycan bankı ilə kredit razılaşmasının imzalanacağı gözlənilir.
"Banklardan biri yaxın zamanlarda ictimaiyyətə təqdim olunacaq. Ayrılan kreditin məbləği bazarda araşdırma başa çatandan sonra müəyyənləşdiriləcək. Çünki bankların şəxsi tələbatı var. Bu tələbatı nəzərə alaraq ayrılan məbləğ fərqli olacaq", - Haqman bildirib.
Onun sözlərinə görə, OeEB bank sektorunun maliyyələşdirilməsinə başlayıb, çünki bu yeni bazarlara çıxış üçün yaxşı əsasdır. Lakin gələcəkdə mikromaliyyə və lizinq şirkətlərinə dəstək göstərilməsi imkanları da müzakirə oluna bilər.
"Biz təkcə bank sektorunda maliyyələşdirməni genişləndirmirik, lakin real sektorun maliyyələşdirilməsinə başlamaq bazarda banklara çıxış üçün növbəti addım olacaq", - o deyib.
OeEB özəl sektorda reginoal iqtisadiyyatın inkişafına təsir edən layihələrin həyata keçirilməsində ixtisaslaşıb. Bu, 2008-ci ildə yaradılmış yeni maliyyə institutudur.
Azərbaycan bankı Unibank-a ayrılmış kredit xətti OeEB-in regionda fəaliyyətə başlayacağı ilk layihədir. Unibank-a ayrılmış maliyyə paketinin ümumi məbləği 83 milyon dollardır. Bunun 37 milyon dolları AYİB-in, 15,6 milyon dolları DEG alman investisiya korporasiyasının, 15 milyon dolları "FMO" inkişaf Niderland maliyyə şirkətinin, 10 milyon dolları isə OeEB-in vəsaitidir.
Məqalə müəllifi ilə əlaqə ünvanı: [email protected]