Azərbaycan, Bakı, 16 iyul / Trend , müxbir N. İsmayılova /
Gəncə Bank ayın sonunda Mərkəzi Bank yanında Azərbaycan İpoteka Fondunun (AİF) xətti ilə ipoteka kreditlərinin verilməsi ilə bağlı müraciətlərə baxılmasını başa çatdıracaq və onların verilməsinə başlayacaq. Bunu bankın Kredit Departamentinin rəhbəri Emin Hacıyev deyib.
"Bank əhalidən gələn müraciətləri nəzərdən keçirir və ayın sonunda AİF xətti ilə ipoteka kreditlərinin verilməsinə başlamağı planlaşdırır", - Hacıyev deyib.
Onun sözlərinə görə, bank əhalidən gələn təxminən 30 müraciəti nəzərdən keçirir, ilkin nəticələrə görə, bank 20-22 müraciət üzrə kredit verməyi planlaşdırır. İpoteka kreditlərinin verilməsi üçün AİF-dən banka ayrılan ilkin məbləğ 500 min manatdır.
"Bankın ipoteka kreditləşməsində prioriteti yeni tikililərin maliyyələşdirilməsidir. Hərçənd fondun şərtlərinə görə, ipoteka krediti təkrar mənzil bazarında satınalma üçün də verilir", - Hacıyev deyib.
Onun sözlərinə görə, kreditlər uzun müddətə verilir.
Gəncə Bank 1994-cü ildən fəaliyyət göstərir. Bankın baş ofisi ölkənin regionunda - Gəncə şəhərində yerləşir.
AİF iyulun 10 günü ərzində 50 ipoteka krediti verib. Maliyyələşdirmənin ümumi həcmi təxminən 3,5 milyon manat təşkil edib. İyunun 1-dən 70 nəfərdən çox adam ipoteka krediti alıb.
Bu günə qədər AİF-ə adi ipoteka krediti almaq üçün 900 şəxs müraciət edib. Daxil olan müraciətlər üzrə kreditin ümumi həcmi təxminən 40 milyon manat təşkil edir.
Azərbaycanda adi ipoteka kreditlərinin maksimum məbləği 50 min manatdır. Adi ipoteka kreditləri 8 faizlə, 25 il müddətinə verilir. Sosial İpotekanın maksimal məbləği 35 min manatdır və illik 4 faizlə 30 il müddətinə verilir. Adi və güzəştli kreditlər üçün ilkin ödəmə 15 faizdir.
İpoteka kreditləşməsinin şərtləri bunlardır: kreditlər milli valyuta - manatla və yalnız Azərbaycan vətəndaşlarına verilir, ipotekanın obyekti yalnız mənzil və şəxsi ev ola bilər, ipoteka kreditləşməsinin məbləği bazar qiymətlərinin 85 faizini keçməməlidir, kredit üzrə aylıq ödəmə borc götürənən aylıq gəlirinin 70 faizini keçməməlidir, həyat və s. sığortalar üzrə müqavlə olmalıdır.
Güzəştli şərtlərlə kredit şəhid ailələrinin üzvlərinə, milli qəhrəmanların ailə üzvlərinə, məcburi köçkünlərə, 3 ildən çox stajı olan dövlət qulluqçularına, elmlər namizədi və doktorluq dərəcəsi olanlara, idman sahəsində xidməti olan şəxslərə, eləcə də minimum xidmət müddəti üç il olan hərbçilərə verilir.
Hər ailənin bir dəfə güzəştli şərtlərlə ipoteka krediti almaq hüququ var.
Fondun kredit səlahiyyətli təşkilatları 17 bankdır. 2009-cu il üçün dövlət büdcəsində sosial ipotekanın maliyyələşdirilməsi üçün 14 milyon manat nəzərdə tutulub.
2005-2009-cu illərdə AİF vasitəsilə ipotekanın maliyyələşdirilməsi üçün Azərbaycanın dövlət büdcəsindən 94 milyon manat ayrılması nəzərdə tutulub. Banklar vasitəsilə bunun 73 milyon manatdan çoxu verilib.
İyulun 16-na olan cari məzənnə 0,8042 AZN/USD təşkil edir.
Məqalə müəllifi ilə əlaqə ünvanı: [email protected]
