Azərbaycan, Bakı, 04 avqust / Trend , müxbir N.İsmayılova /
Azərbaycanın ipoteka bazarındakı tendensiyalar özünümaliyyələşdirən mexanizmə keçid üçün nikbindir. Bu barədə Qiymətli Kağızlar üzrə Dövlət Komitəsinin sədri Rüfət Aslanlı bildirib.
"Klassik ipoteka mexanizmi bilavasitə bazar üzərindən maliyyələşdirilir, iyun ayından etibarən ölkənin ipoteka bazarında meydana gələn tendensiyalar isə özünümaliyyələşdirən modelə keçid üçün nikbindir", - deyə Aslanlı bildirib.
Onun sözlərinə görə, bazardakı tələbat ölkə büdcəsində planlaşdırılan bütün vəsaiti ipoteka kreditləşdirməsinə yatırmaq üçün kifayətdir.
"Birjaya qoyulan ipoteka istiqrazlarının sərmayədarları yerli banklardır. Belə ki, qiymətli kağızlar bazarında tələbatın stimullaşdırılmasının əsas meyarlardan biri olmasına baxmayaraq, ölkədə fərdi sərmayədarlar qrupu formalaşmayıb", - deyə o bildirib.
Azərbaycanın 2005-2009-cu illər üzrə dövlət büdcəsində AİF üzərindən ipotekanın maliyyələşdirilməsi üçün 94 milyon manat nəzərdə tutulub ki, bunun da hələ ki, 78,5 milyon manatı ayrılıb. Bununla yanaşı, fond bazara hər biri 1000 manat dəyərində olan 55 min istiqraz buraxıb. Emissiyanın ümumi məbləği 55 milyon manat təşkil edir ki, onun da 20 milyon manatı realizə edilib. Sözügedən emissiyanın tam yerləşdirilməsi 1100 ipoteka kreditinin verilməsinə imkan verəcək.
2009-cu ildə sosial ipotekanın maliyyələşdirilməsi üçün dövlət büdcəsinə 14,5 milyon manat yatırılıb.
Fondun səlahiyyətli kredit təşkilatları 17 bankdır.
Məqalə müəllifi ilə əlaqə ünvanı: [email protected]
