Azərbaycan, Bakı, 04 avqust / Trend , müxbir N.İsmayılova /
Beynəlxalq Maliyyə Korporasiyası (IFC ) Azərbaycanda korporativ idarəetmənin müasir standardlarının tətbiqinə texniki dəstək proqramı (ACGP) çərçivəsində payızda Azərbaycan bankları və sahibkarlar üçün antiböhran proqramını təqdim edəcək. Bu barədə çərşənbə axşamı İFC layihəsinin rəhbəri Karolina Brayt deyib.
"Hazırda işlənilən antiböhran proqramı iki sahəyə - bank və kiçik və orta sahibkarlığa istiqamətləndirilib", - Brayt deyib.
Onun sözlərinə görə, banklar üçün proqram ilkin olaraq, problemli kreditlərin idarə olunmasında köməyi və təlimi nəzərdə tutur. İkinci proqram müxtəlif sahələri əhatə edəcək. Bura nağd vəsait axının və likvidliyin yaxşılaşdırılması imkanları və risklərin idarə olunması üzrə kurslar daxildir.
Hazırda Azərbaycan iqtisadiyyatında IFC-nin investisiya portfeli 131 milyon dollar təşkil edir. Ölkədə ümumilikdə ümumi məbləği 300 milyon dollardan çox olan 30 layihə həyata keçirilib. 2005-ci ildən ACGP proqramı çərçivəsində 400-dən çox şirkətlə məsləhətləşmələr aparılıb. Bununla da korporasiya şirkətlərin - 17 milyon dollardan çox məbləğdə investisiya layihələrinin iştirakçılarının cəlb edilməsinə kömək edib.
Məqalə müəllifi ilə əlaqə ünvanı: [email protected]
