Azərbaycan, Bakı, 07 avqust / Trend , müxbir N.İsmayılova /
Azərbaycanda yeganə qızıl istehsalçısı olan Anglo Asian Mining Plc. şirkəti qızılın birinci partiyasının satışı, eləcə də Gədəbəy qızıl-mis yataqlarında əməliyyatların və istehsalın yenidən başlaması barədə məlumat verib.
Şirkət Gədəbəydəki əməliyyatların başlanğıc mərhələsində dövriyyə kapitalı kimi istifadə olunan 6,5 milyon dollarlıq maliyyənin ayrılması barədə Azərbaycan Beynəlxalq Bankı (ABB) ilə razılaşıb.
Gədəbəy mədənlərində hazırda emal mərhələsində olan ilk qızıl və gümüş 2009-cu ilin mayında hasil olunub. Şirkət 795 unsiya qızıl hasil edib və qarışıqlardan təmizləyib. Bundan 630 unsiya artıq satılıb. Təxminən 64 unsiya tezliklə, qızılın əyarının müəyyənləşdirilməsi üzrə kimyəvi yoxlama nəticələri tamamlanandan sonra reallaşdırılacaq.
Şirkət əməliyyatların ilk ilində qızıl istehsalı proqnozlarını redaktə edib və təxminən 50 000 unsiya qızıl hasil etməyi nəzərdə tutur ki, bu rəqəm də 70 min unsiyalıq ilkin proqnozlardan aşağıdır.
Dövriyyə kapitalının məhdudlaşdırılmasına reaksiya kimi şirkət ABB ilə 6,5 milyon dollarlıq kreditin alınmasına dair müqavilə imzalayıb. Bu vəsait şirkətin faiz ödəmələrinə yönləndirilib. Ödəmələr 2010-cu ilin iyununda 500 min dollarlıq ilk ödəmə ilə 13 ödəmə vasitəsilə həyata keçiriləcək. Sonra 2013-cü ilin iyununa qədər hər üç aydan bir ödəmə aparılacaq. Ümumiyyətlə, Beynəlxalq Bankdan ümumi məbləği 34,4 milyon dollar olan üç kredit alınıb. Bu kreditlər qızıl satışından əldə olunan pulların hesabına ödəniləcək.
Şirkətin prezidenti Rza Vəzirinin sözlərinə görə, növbəti bir neçə ay dövriyyə kapitalı ilə vəziyyətin idarə olunmasında xeyli səy tələb edir. Şirkət müqavilə çərçivəsində əlavə resurslar üzə çıxartmaq niyyətindədir.
"Şirkət Azərbaycanda yeganə qızıl istehsalçısı kimi mövqeyini möhkəmləndirənə qədər bu irəliləyiş ABB-nin dəstəyi olmadan mümkün deyil", - o deyib.
Azərbaycan Beynəlxalq Mədən Əməliyyat Şirkəti altı sahədə istismar işləri apacaq. Onlardan biri Naxçıvan MR-də, biri Tovuz, biri Gədəbəy rayonunda, üçü işğal olunmuş ərazilərdə (Kəlbəcərdə "Zod", Ağdərədə "Qızılbulaq", Zəngilanda "Vecnəli" yataqları) yerləşir. Müqaviləyə əsasən, yataqlardan 400 ton qızıl, 2500 ton gümüş, 1,5 milyon ton mis hasilatı planlaşdırılır.
Ümumiyyətlə, 2015-ci ilə qədər Gədəbəy yatağından 300 min unsiyadan çox qızıl çıxartmaq planlaşdırlır.
İlk "qızıl müqaviləsi" hələ 1997-ci ildə imzalanıb. Ölkə yalnız 2009-cu ildə ilk qızıl külçələrini alıb. Azərbaycan Beynəlxalq Mədən Əməliyyat Şirkəti 30 il müddətinə imzalanmış müqavilədə hasılatın bölgü hissəsi ilə iştirak edir. Azərbaycanın müqavilədə pay iştirakı 51 faiz, Britaniyanın Anglo Asian Mining Plc. şirkətinin iştirakı isə 49 faizdir.
Məqalə müəllifi ilə əlaqə ünvanı: [email protected]