Azərbaycan, Bakı, 13 avqust / Trend , müxbir İ.Xəlilova /
Oktyabrda Bakı yenidən MDB ölkələrinin maliyyə-bank sektoru üçün dünya maliyyə böhranının nəticələrinin müzakirəsi və ona qarşı birgə tədbirlərin hazırlanması üzrə mərkəzə çevriləcək. Oktyabrın 13-15-də Bakıda MDB İcraiyyə Komitəsi və Azərbaycan hökumətinin dəstəyi ilə MDB Maliyyə-Bank Şurası (MDB MBŞ) tərəfindən təşkil olunmuş "MDB üzv ölkələrinin kommersiya banklarının antiböhran siyasəti" mövzusunda beynəlxalq bank konfransının keçirilməsi planlaşdırılır. Bu barədə cümə axşamı Azərbaycan Banklar Assosiasiyasının prezidenti Eldar İsmayılov deyib.
"Tədbir yüksək səviyyədə keçiriləcək və Rusiyanın Baş naziri Vladimir Putinin də gəlişi gözlənilir", - İsmayılov bildirib.
Onun sözlərinə görə, ilkin bildirişə əsasən bank konfransında birliyin bank sistemlərinin müzakirəsi, antiböhran proqramlarının razılaşdırılması planlaşdırılır.
"Beynəlxalq bank konfransının Azərbaycan paytaxtında ardıcıl ikinci dəfə keçirilməsi, ölkənin son illər ərzində sosial-iqtisadi inkişafının yüksək tempi nəzərə alınmaqla, son dərəcə səciyyəvidir. Birliyin icraçı katibi Sergey Lebedyevin sözlərinə görə, bu konfrans qarşılıqlı sərfəli əlaqələrin qurulması və möhkəmləndirilməsi, işgüzar dairələrin sənaye və sərmayə potensialının prezentasiyası və MDB dövlətlərinin maliyyə-bank sahəsində inteqrasiya proseslərinin dərinləşdirilməsi üçün nüfuzlu meydan qismində çıxış edə bilər.
Ötən konfransda bank sistemlərinin, birjaların inteqrasiyası, vahid hesabat-ödəmə sisteminin yaradılması, MDB məkanı daxilində qarşılıqlı hesablaşmaların milli valyutalarda həyata keçirilməsi üzrə müxtəlif təkliflər səsləndirilmişdi.
İştirakçıların fikrincə, beynəlxlaq maliyyə mərkəzinin yaradılması birlik məkanında maliyyə-bank sisteminin inkişafı və valyuta inteqrasiyası yolunda mümkün addımlardan biri ola bilər. Dünya maliyyə böhranı şəraitində MDB maliyyə-bank bazarının yaradılması çox aktual məsələdir. MDB MBŞ-nin koordinasiya şurasının sədri Anatoli Kazakovun fikrincə, o, Rusiya, Azərbaycan və Qazaxıstandakı regional mərkəzlərlə yaradıla bilər.
MDB və Şərqi Avropanın maliyyə-bank şurası artıq iki ildən çoxdur fəaliyyət göstərir və oktyabrda keçiriləcək tədbir ikinci beynəlxlaq bank konfransı olacaq. Belə tədbirlərin keçirilməsinin ənənə halını alacağı gözlənilir. Onun iştirakçıları hələ ötən il hesab ediblər ki, Azərbaycanda konfransın daima Bakıda keçirilməsi üçün bütün (infrastruktur, maliyyə və institutsional) imkanlar var.
Məqalə müəllifi ilə əlaqə ünvanı: [email protected]
