Azərbaycan, Bakı, 17 avqust / Trend , müxbir İ.Хəlilova /
Asiya İnkişaf Bankı (AİB) və Azərbaycan hökuməti Azərbaycanda su təchizatı və kanalizasiya sisteminin bərpası üçün 600 milyon dollar həcmində multitranş maliyyələşdirilməsi və birinci layihə üzrə kredit müqaviləsi üzrə rəsmi danışıqları başa çatdırıblar. Bu barədə bazar ertəsi bankın Bakı nümayəndəliyindən deyilib.
"Danışıqlar uğurlu keçdi və bu bizə onun AİB Direktorlar Şurasının ilk MFF növbəsində - sentyabrın 24-də təsdiq edilməsi üçün təqdimetmə imkanı verir", - nümayəndəlikdən bildirilib.
Danışıqlara əsasən, MFF-in 75 milyon dollar həcmində ilk tranşını bank Ağdaş, Göyçay və Naxçıvanda su təchizatı və sanitar xidmət sistemlərinin yaxşılaşdırılması layihəsinə ayıracaq və hökumətin buradakı payı 25 milyon dollar təşkil edəcək. AİB kredit müqaviləsi üzrə layihə üçün adi kredit resursları ayırır. Onlar dörd ili güzəştli olmaqla 24 il müddətinə, illik dərəcəsi libor+0,2 faiz olmaqla verilir.
"Bu vəsaitlər layihə tələbatının bir hissəsini ödəyəcək, sonrakı maliyyələşdirmə isə onun MFF hesabına realizəsi üzrə ayrılacaq", - nümayəndəlikdən deyilib.
Birinci tranşın vəsaitləri Ağdaş, Göyçay və Naxçıvanda su təchizatı və sanitar xidmət sistemlərinin yaxşılaşdırılması layihəsinin bahalaşması ilə əlaqədar olaraq əlavə xərclərin ödənilməsinə yönəldilir.
İkinci tranş analoji layihənin əhatə zonasının daha üç şəhər - Ağcabədi, Beyləqan və Balakəndə genişləndirilməsi üçün nəzərdə tutulub.
Üçüncü tranşın Bakı ətrafında su təchizatı və kanalizasiyanın mərkəzləşmiş sisteminin yaradılması üçün ayrılması nəzərdə tutulur.
Birinci layihənin hazırkı dizaynı (Ağdaş, Göyçay və Naxçıvanda su təchizatı və sanitar xidmət sistemlərinin yaxşılaşdırılması) 2004-cü ildə hazırlanıb. Bu müddət ərzində tikinti materiallarının qiymətləri artıb. Xüsusilə, kanalizasiya sahəsində xərclərin artımı nəzərə çarpır. Azərbaycan tərəfindən layihənin əhatə etdiyi regionlarda kanalizasiya sistemində müasir avadanlığın quraşdırılması təklifi də onun qiymətinə təsir edir. Üstəlik, AİB-in layihəsində bu rayonlarda su təchizatı və kanalizasiyanın tam bərpası da nəzərdə tutulub.
İlkin olaraq layihənin dəyəri 39,9 milyon dollar təşkil edib. Layihənin maliyyələşdirilməsi üçün AİB ilk olaraq 30 milyon dollar ayırıb, hökumətin payı 9,9 milyon dollar olub.
Su layihəsi üzrə "Azərsu" SC-nin müşaviri qismində AICO Consulting Ltd/European Consultans Organization konsorsiumu çıxış edir.
Məqalə müəllifi ilə əlaqə ünvanı: [email protected]
