Azərbaycan, Bakı, 01 sentyabr / Trend , müxbir E.İsmayılov /
Xarici şirkətlər konsersiumu sentyabrın sonuna "Bakı metropoliteninin 20 illik inkişafı üzrə Dövlət Proqramı" çərçivəsində ilkin layihəni təqdim edəcək. Bu barədə çərşənbə axşamı metropolitendəki işə yaxın mənbədən məlumat verilib. Proqram çərçivəsində 40 yeni metrostansiyanın açılması planlaşdırılır.
"İlkin layihənin hazırlanması çərçivəsində işlər davam etdirilir və sentyabrın sonuna xarici şirkətlər tərəfindən ilkin layihənin azı dörd variantının təqdim ediləcəyi planlaşdırılır", - mənbədən deyilib.
Xarici şirkətlər konsersiumuna Fransanın SYSTRA SA, Çexiyanın MOTT McDonalds və Cənubi Koreyanın SAMAN şirkətləri daxildir. Bu konsersiumda Fransa şirkəti aparıcı rola malikdir.
Mənbədən bildirildiyi kimi, planın ilkin variantları təqdim ediləndən sonra təsdiq üçün müvafiq strukturlara göndəriləcək.
Metropolitenin inkişafı proqramı çərçivəsində artıq paytaxtın şəhərdə sərnişin axınını əks etdirən nəqliyyat modeli hazırlanıb. "Onların hazırlanması üçün bütün səlahiyyətli strukturların (Dövlət Statistika Komitəsi, Nəqliyyat Nazirliyi və s.) təqdim etdiyi materiallardan istifadə olunub", - mənbədən deyilib. Şəhərdə səhiyyə və təhsil obyektlərinin yerləşdirilməsini öyrənmək məqsədi ilə xarici şirkətlər Səhiyyə və Təhsil nazirlikləri ilə də işləyib.
Mənbədən bir müddət əvvəl deyildiyi kimi, xarici şirkətlər konsersiumu 14 ay ərzində dövlət proqramı çərçivəsində layihələndirməni və yeni nəqliyyat xətlərinin texniki-iqtisadi əsaslandırılmasını tamamilə başa çatdırmalıdır.
Azərbaycan Prezidenti İlham Əliyevin "Bakı metropoliteninin perspektiv inkişafı ilə bağlı bəzi tədbirlər haqqında" sərəncamı üzrə yeni proqramın hazırlığına başlamaq üçün Prezidentin Ehtiyat Fondundan Bakı metropoliteninə iki milyon manat ayrılıb.
Bakı metropoliteni 1967-ci ildən fəaliyyət göstərir və 21 stansiyası var. Bu ilin sonuna 22-ci - "Azadlıq prospekti" stansıyasının istismara verilməsi planlaşdırılır.
Məqalə müəllifi ilə əlaqə ünvanı: [email protected]
