Azərbaycan, Bakı, 02 oktyabr / Trend , müxbir Ü.İsmaylova/
Azərbaycanın müxtəlif regionlarında müşahidə olunan leysan yagışları nəticəsində ən çox ziyan dəymiş və zərər çəkən Xaçmaz, Hacıqabul, Salyan və Masallı rayonlarıdır. Bu barədə Kənd Təsərrüfatı Nazirliyinin heyvandarlıq şöbəsinin müdiri Çingiz Fərəcov cümə günü məlumat verib.
"Sel suları yağıntının normadan on dəfə çox olması ilə əlaqədardır", - Fərəcov deyib.
Onun sözlərinə görə, sel suları bu regionların tam ərazilərini əhatə etməyib və Masallı rayonunda tərəvəzçiliyə, Xaçmaz rayonunda bağçılıq və tərərvəzçiliyə, digər regionlarda isə üzümçülüyə daha çox ziyan dəyib. Fərəcov həmçinin bildirib ki, pambıq yığımı da yağıntılar səbəbindən gecikir.
"heyvandarlıq sahəsində ziyan əsasən Hacıqabul rayonuna dəyib ki, burada 30 baş iribuynuzlu mal-qara, 300-ə yaxın qoyun və keçi, 9 min toyuq tələf olub", - o deyib.
Dəymiş ziyanın həcmi dəqiqləşdirilib Nazirlər Kabinetinə təqdim olunacaq.
Fərəcov onu da bildirib ki, qərara əsasən seldən zərərçəkənlərə dövlət tərəfindən kompensasiyalar veriləcək.
Məqalə müəllifi ilə əlaqə ünvanı: [email protected]