Azərbaycan, Bakı, 05 oktyabr / Trend /
Oktyabrın 1-dən Unibank yeni pul köçürmələri sistemi - LiDER ilə işə başlayıb və bununla da beynəlxalq pul köçürmələri sistemlərinin operatorları olan şirkətlərlə əməkdaşlığı genişləndirərək onların sayını yeddiyə çatdırıb. Bu barədə bankın məlumatında deyilir.
MDB-də fiziki şəxslər üçün hesab açılmadan pul köçürmələri sistemləri arasında əsaslardan biri sayılan LİDER Rusiya, bütün MDB dövlətləri, ABŞ, İspaniya, Çin, İsrail, Çexiya, Yunanıstan, Böyük Britaniya, Portuqaliya, Belçika, İsveçrə, İtaliya, Türkiyə və Estoniya da daxil olmaqla dünyanın 20-dən artıq ölkəsində pul vəsaitlərinin qəbulu və göndərilməsi üzrə 7000 məntəqəyə malikdir.
LİDER pul köçürmələri sisteminin fərqliliyi vəsaitlərin göndərilməsi və alınması tezliyinin minimal xərclərlə və etibarlılıq zəmanəti ilə birləşməsidir. Bundan başqa, bu pul köçürmələri şəbəkəsində köçürmələrə görə komissiya haqqını həmişə ancaq göndərən tərəf ödəyir, alıcıdan isə bu haqq tutulmur.
"Keyfiyyətli və rəqabətədavamlı bir xidmət təqdim edən LİDER beynəlxalq pul köçürmələri sistemi müştərilərimizin ən geniş dairəsinə istiqamətlənib", - deyə Unibank-ın pərakəndə biznesin inkişafı üzrə supervayzeri Güney Axundova qeyd edib. Onun sözlərinə görə, LİDER sistemi daxilində Unibank-ın bütün filiallarında müştərilər köçürmələri istər rus rublu ilə, istərsə də ABŞ dolları və ya avro ilə ala biləcəklər.
"Öz işində LİDER köçürmələri ani olaraq həyata keçirməyə imkan verən müasir texnologiyalardan istifadə edir. Bu sistemin ən mühüm üstünlüklərindən biri isə tariflərdir, Unibank-da onlar 1,2%-dən başlayırlar", - o deyib.
Unibank-da pul köçürmələri sistemləri vasitəsilə vəsaitlərin göndərilməsi və ya alınması zamanı bütün müştərilər əlavə bonuslar qazanmaq imkanı əldə edirlər. Bir gün ərzində Unibank-da 500$/500EUR (20 000 RUR) və daha artıq məbləğdə pul göndərənlər və ya alanlar mobil telefon üçün konturlu kart şəklində bonus əldə edirlər. Aksiya bankın Gəncə, Sumqayıt, Şəmkir, Quba, Mingəçevir və Şəkidəki filialları da daxil olmaqla bütün xidmət şəbəkələrində qüvvədədir.
LİDER-dən başqa, Unibank daha altı beynəlxalq pul köçürmələri sistemi - "Western Union" (2000-ci ildən), "Bıstraya Poçta" (2005-ci ildən), "CONTACT" (2006-cı ildən), "Faster" (2007-ci ildən), "XPmoney" (2007-ci ildən) və "Migom" (2008-ci ildən) ilə işləyir. Bu il bankın pul köçürmələri üzrə dövriyyəsi artıq 21 milyon ABŞ dollarına yaxın bir məbləğ təşkil edir ki, bu da ötən ilin analoji dövrü ilə müqayisədə 11,5% artıqdır. Hər saat Unibank-ın xidmət şəbəkələri vasitəsilə fiziki şəxslər tərəfindən hesab açılmadan 25 pulköçürmə həyata keçirilir. Xatırladaq ki, 2008-ci ildə Unibank-ın xidmət şəbəkələri vasitəsilə ümumi həcmi 27,5 mln. ABŞ dollarına bərabər olan pul köçürmələri həyata keçirilmişdi.