Azərbaycan, Bakı, 14 oktyabr / Trend , müxbir Ü.İsmayılova/
Azərbaycan Parlamentinin İqtisadi siyasət üzrə komitəsi payız sessiyası çərçivəsində "Lizinq fəaliyyəti haqqında" qanun layihəsini müzakirə edəcək, bu barədə çərşənbə günü komitənin başçısı Ziyad Səmədzadə bildirib.
"Biz yaxın zamanda qanun layihəsinin müzakirəsi və sənədin parlamentin müzakirəsinə verilməsi üçün Azərbaycanın Lizinq Şirkətləri Assosiasiyasının (ALŞA) üzvlərini komitəyə dəvət etmək niyyətindəyik", - Səmədzadə bildirib.
Onun sözlərinə əsasən, qanunun qəbul olunmasının əsas məqsədi Azərbaycanda lizinq fəaliyyətinin inkişafına yardım etmək olacaq.
Azərbaycanın Lizinq Şirkətləri Assosiasiyasından bildirilib ki, assosiasiya hazırda "Lizinq fəaliyyəti haqqında" qanun layihəsini hazırlamağı davam etdirir və komitə başçısı ilə müzakirələr aparıldıqdan sonra qanun layihəsi parlament komitəsinə təqdim olunacaq.
ALŞA-nın başçısının əvvəlcədən qeyd etdiyi kimi, assosiasiya ölkədə lizinq fəaliyyətinin tənzimlənməsi üçün tövsiyələr, Mülki və Vergi Məcəlləsinə dəyişikliklərin edilməsi üzrə təkliflər hazırlayır.
Onun sözlərinə əsasən, assosiasiya həmçinin lizinq fəaliyyətini tənzimləyən ayrıca bir qanunun işlənib hazırlanması məsələsini müzakirə edir. Mülki Məcəlləyə dəyişikliklərin edilməsi üzrə təkliflər, Əhmədovun sözlərinə əsasən 2010-cu ildə, Vergi Məcəlləsi üzrə isə 2011-ci ildə hökumətə təqdim olunacaq.
Azərbaycan və Mərkəzi Asiyada lizinnqə texniki dəstək layihəsini həyata keçirən Beynəlxalq Maliyyə Korporasiyasının (BMK) məlumatına əsasən, Azərbaycanda lizinqlə məşğul olan şirkət və bankların sayı 20-dən artıqdır, lakin bu sahədə fəal çalışanların sayı isə cəmi 5-6-dır.
ALŞA-ya illik üzvlük haqqı 2,5 min manat həcmində müəyyən olunub. Assosiasiya 2004-cü il oktyabrın 27-də Ataleasing, Unileasing, Muganleasing şirkətləri tərəfindən təsis edilib.
Məqalə müəllifi ilə əlaqə ünvanı: [email protected]
