Azərbaycan, Bakı, 19 oktyabr / Trend , müxbir Ü.İsmayılova/
Azərbaycanın Maliyyə Nazirliyi 2009-cu ilin yanvar-sentyabr ayları ərzində on sığorta şirkətinin fəaliyyət yekunlarını açıqlayıb. Qeyd edək ki, həmin şirkətlərin payına ümumi sığorta yığımlarının 81,34 faizi və ümumi ödəmələrin 84,47 faizi düşür. Azərbaycanda cəmi 28 sığorta şirkəti və bir təkrar sığorta şirkəti fəaliyyət göstərir.
Xalg Sigorta sığorta yığımlarının həcminə görə reytinqə başçılıq edir. Şirkət artıq üç aydır ki, liderliyini qoruyur. Ödənişlərin ən böyük həcmi MBASK-ın payına düşür.
Ölkədə fəaliyyət göstərən bütün şirkətlərin haqlarının ümumi həcmi oktyabrın 1-nə 130,18 milyon manat, hesabat dövrü ərzində ödənişləri isə 38,22 milyon manat təşkil edib. Azərbaycanın Maliyyə Nazirliyinin yanvar-sentyabr ayları üzrə hesabatında yeganə təkrar sığorta şirkəti Az RE-nin fəaliyyət yekunları göstərilməyib.
İl ərzində bütün sığorta şirkətlərinin haqları 12,46 faiz, ödənişləri isə 3,66 faiz azalıb.
Oktyabrın 19-na olan rəsmi məzənnə 0,803 AZN/USD təşkil edir.
Məqalə müəllifi ilə əlaqə ünvanı: [email protected]
