Azərbaycan, Bakı, 19 oktyabr / Trend , müxbir N.İsmayılova/
Azərbaycan İnvestisiya Şirkəti (AİŞ) və Özəl sektorun inkişafı üzrə İslam Korporasiyası (ICD) tərəfindən təsis edilən Xəzər Beynəlxalq İnvestisiya Şirkətinin (CIIC) nizamnamə kapitalının iki dəfə artırılaraq, 46 milyon manata çatdırılması planlaşdırılır. Bu barədə CIIC-nin icraçı direktoru Toğrul Köçərli bazar ertəsi bildirib.
"Hazırda Yaxın Şərqin sərmayədarları ilə danışıqlar aparılır. Bundan əlavə, bir neçə Azərbaycan holdinqlərində və Avropa sərmayədarlarında da bu məsələyə maraq oyanıb", - Köçərli deyib.
Onun sözlərinə görə, əvvəllər cari ilin sonunadək nizamnamə kapitalını 55 milyon manata çatdırmaq şikətin planına daxil olub. İndi də şirkət bu planlardan imtina etmək fikrində deyil. CIIC-nin nizamnamə kapitalı 23 milyon manata bərabərdir. Bu məbləğin 17 milyon manatı xarici sərmayədarların payına düşür. Şirkətin xarici sərmayədarları bunlardır: Küveytin Hares Group investisiya şirkəti, Yəmənin Al Ahmar Group investisiya şirkəti, Sudanın MAM Group şirkəti, Dubayın TANIMIYATY Group şirkəti, həmçinin İslam İnkişaf Bankı.
Caspian International Investment Company 2008-ci ilin martında 2,954 milyon manatlıq ilkin kapitalla QSC kimi qeydiyyatdan keçib. AİŞ-in iştirak payı 25, ICD-nin iştirak payı isə 75 faiz təşkil edib.
Strategiyaya əsasən, investisiyalar şəriət prinsiplərinə zidd olan spirtli içkilər və donuz ətindən olan məhsulların istehsalı üzrə müəssisələr, həmçinin standart maliyyələşdirmə və sığorta xidmətlərinin göstərilməsi şərtləri ilə fəaliyyət göstərən banklar və sığorta təşkilatları istisna olmaqla, iqtisadiyyatın real sektorundə həyata keçiriləcək.
Oktyabrın 19-na olan rəsmi məzənnə 0,803 AZN/USD təşkil edir.
Məqalə müəllifi ilə əlaqə ünvanı: [email protected]
