Azərbaycan, Bakı, 21 oktyabr / Trend , müxbir İ.Xəlilova/
Azərbaycan hökuməti ölkənin strateji valyuta ehtiyatlarının bir hissəsini kommersiya banklarının idarəsinə verilməsi fikrindən imtina edib. Mərkəzi Bankın İdarə Heyətinin dəsri Elman Rüstəmov çərşənbə günü deyib.
"Əlavə likvidliyə ehtiyac duyan bir neçə banka dəstək göstərmişik, buna görə də bu məsələ artıq müzakirə edilmir", - Rüstəmov deyib.
Onun sözlərinə görə, bank tərəfindən 150 milyon manat həcmində yardım göstərilib.
Valyuta ehtiyatlarının bir hissəsinin kommersiya banklarında yerləşdirilməsi fikri Prezident İlham Əliyev tərəfindən ilin əvvəlində səsləndirilib. Dövlət başçısı qeyd edib ki, valyuta rezervlərinin bir hissəsi ölkənin ən etibarlı banklarında yerləşdirilə bilər. Lakin bu vəsaitlər iqtisadiyyatın real sektorlarına yönəldilməli və onların üzərində ciddi dövlət nəzarəti olmalıdır.
Dünən Dovlət Neft Fondunun icraçı direktoru Şahmar Mövsümov da hazırda bu məsələnin müzakirə olunmadığını deyib.
2009-cu ilin üçüncü rübünün yekunlarına görə, ölkənin strateji valyuta ehtiyatları 2003-cü ildən bu günə 11,6 dəfə artaraq 19,1 milyard manat təşkil edib. 2009-cu ilin sonunadək valyuta ehtiyatlarının 20 milyardadək artacağı, ARDNF-in aktivlərinin isə 14,5 milyard dollar səviyyəsində olacağı gözlənilir.
