Özbəkistan, Daşkənd, 27 oktyabr / Trend , müxbir D.Əzizov/
"Uzbekistan temir yulları" Dövlət Səhmdar Dəmiryol Şirkəti (DSDŞ) Əfqanıstanda Xayratondan Məzari-Şərifə qədər dəmiryolu inşa edəcək. Bu barədə çərşənbə axşamı MDB və Baltikyanı ölkələrin Dövlət Dəmiryol Nəqliyyatı Şurasının iclasında Özbəkistanın Baş nazirinin müavini Batir Xocayev bildirib.
"Uzbekistan temir yulları" rəhbərliyindəki mənbənin sözlərinə görə, DSDŞ Xayratondan Məzari-Şərifə çəkilən 75 kilometrlik dəmiryolun inşası üzrə Əfqanıstan hökuməti tərəfindən elan olunan tenderin qalibi olub.
Layihə Asiya İnkişaf Bankının 165 milyon dollar və Əfqanıstan hökümətinin təxminən 5 milyon dollar vəsaiti hesabına həyata keçiriləcək.
"Hazırda "Uzbekistan temir yulları" ilə Əfqanıstan hökuməti arasında müqavilənin imzalanmasına dair şərtlər barədə danışıqlar gedir. Gözlənildiyi kimi, cari ilin sonuna qədər müqavilə imzalana bilər", - şirkət nümayəndəsi deyib.
İlkin məlumata görə, dəmiryolun inşasına 2010-cu ildə başlanılmalı və 2011-ci ildə başa çatdırılmalıdır.
Əfqanıstana idxal olunan malların demək olar ki, yarısı Xayraton limanı vasitəsilə həyata keçirilir və yeni dəmiryolun istismara verilməsi yükdaşımaları əhəmiyyətli dərəcədə artıracaq.
"Uzbekistan temir yulları" DSDŞ 1994-cü ildə Orta Asiya Dəmiryollarının tərkibindən çıxandan sonra yaradılıb. Nizamnamə kapitalı şirkətin yeddi bölməsinin dövlət aktivləri hesabına formalaşıb və 197,6 milyard sum təşkil edib. Nizamnamə kapitalı 100 faiz hökümətə məxsusdur.
Özbəkistanın dəmiryollarının ümumi uzunluğu 4,1 min km təşkil edir. Ölkə daxilində yükdaşımaların 66 faizi, ümumi ixrac və idxal üzrə yükdaşımaların isə 80 faizi dəmiryollarının payına düşür.
Oktyabrın 27-nə olan rəsmi məzənnə 1503,5 sum/1$ təşkil edir.
Məqalə müəllifi ilə əlaqə ünvanı: [email protected]