Azərbaycan, Bakı, 16 mart / Trend , müxbir E.İsmayılov/
Novruz bayramı ilə əlaqədar olaraq "Azərbaycan Dəmir Yolları" Qapalı Səhmdar Cəmiyyətinin kollektivi gücləndirilmiş iş rejimində işləyəcək. Bunu çərşənbə axşamı ASC-nin mətbuat xidmətinin rəhbəri Nadir Əzməmmədov deyib.
"Bayram günlərində sərnişinlərin sayının artacağı ilə əlaqədar ASC gücləndirilmiş iş rejimində işləyəcək", - Əzməmmədov deyib.
Onun sözlərinə görə, istirahət və bayram günləri ilə əlaqədar yaranan sərnişin sıxlığını nəzərə alan "Azərbaycan Dəmir Yolları" QSC-nin Sərnişindaşıma İstehsalat Birliyi ölkə daxilində hərəkət edən sərnişin qatarlarına əlavə vaqonların qoşulmasını təmin edəcək. Sərnişin sıxlığından asılı olaraq bayram günlərində 15-20 əlavə vaqonun qoşulması nəzərdə tutulur.
Bundan başqa, operativliyin və təhlükəsizliyin təmin olunması məqsədi ilə müvafiq strukturlar növbəli iş rejimində işləyəcək.
