Azərbaycan, Bakı, 30 mart / Trend , müxbir Ü. İsmayılova/
Səudiyyə İnkişaf Fondu Bakının bir sıra yaşayış sahələrinin kanalizasiya və su təchizatı sisteminin yenidən qurulmasına 25 milyon dollar ayırıb. Bu barədə çərşənbə axşamı Səudiyyə Ərəbistanının Azərbaycandakı səfirliyindən bildirilib.
"Bakının kanalizasiya və su təchizatı sisteminin yenidən qurulması və genişləndirilməsi" layihəsi çərçivəsində kreditin ayrılması haqqında müqavilə Səudiyyə İnkişaf Fondunun nümayəndə heyətinin martın əvvəli Bakıya səfəri zamanı imzalanıb", - səfirlikdən bildiriblər. Sənəd təsdiq edilməsi üçün artıq ölkə parlamentinə təqdim edilib.
Layihə çərçivəsində Bakının Bibiheybət ərazisindəki "20-ci sahə" yaşayış massivində, həmçinin, yaxın ərazilərdə su təchizatı və kanalizasiya sistemində beynəlxalq standartlara cavab verən təmir aparılması planılaşdırılır.
İmzalanan müqaviləyə əsasən, Səudiyyə İnkişaf Fondu illik iki faiz dərəcə ilə beş il güzəştli olmaqla 20 il müddətə kredit ayırıb.
