Azərbaycan, Bakı, 15 aprel /Trend, müxbir İ.Xəlilova/
2010-cu ilin birinci rübündə Azərbaycanda sənaye istehsalı 7,1 milyard manat təşkil edib ki, bu da 2009-cu ilin analoji dövr göstəricisindən 5,6 faiz çoxdur. Bu barədə cümə axşamı Dövlət Statistika Komitəsindən deyilib.
Hesabat dövrü ərzində hasilat sənayesinin istehsal həcmi 6,2 faiz artaraq 5,513 milyard manat, xüsusi çəkidə isə 77,2 faiz təşkil edib. Emal sənayesinin xüsusi çəkisi 16,7 faiz, elektik enerjisi və qaz sektorunun xüsusi çəkisi 5,7 faiz, su sektorunun xüsusi çəkisi isə 0,4 faiz təşkil edib.
Azərbaycan Beynəlxalq Əməliyyat Şirkəti (ABƏŞ) tərəfindən hesabat dövrü ərzində neft hasilatının həcmi 7,8 faiz artaraq 10,2 milyon ton, təbii qazın hasilat həcmi isə 8,2 faiz azalaraq 2,8 milyard kubmetr təşkil edib.
Rüb ərzində özəl sektorun payı 5,8 faiz artaraq ümumi sənaye istehsalının 81,7 faizini təşkil edib.
Emal sənayesinin istehsal həcmi 1 191,39 milyon manat təşkil edib. Birinci rüb ərzində əhəmiyyətli artım kimya sənayesində müşahidə olunub (277,8 faiz). Həmçinin avtomobil (qoşqulu və yarımqoşqulu) 13,9 faiz, maşın və avadanlıqlar 62,6 faiz artıb.
Qida məhsullarının istehsalında cəmi 0,1 faiz artım müşahidə olunub. Həmin istehsalatda makaron istehsalı 4,3 faiz artaraq 1260,9 ton təşkil edib. Ət istehsalı 3,9% (41,4 min ton), süd istehsalı 3% (158,9 min ton), kərə yağı istehsalı 0,9% (3,6 min ton), cem və mürəbbə isə 14,8% (1,7 min ton) artıb.
Aprelin 15-nə olan cari məzənnə 0,8034 AZN/USD təşkil edir.