Azərbaycan, Bakı, 17 aprel /Trend, müxbir Ü.İsmayılova/
İlin birinci rübündə MDB ölkələrindən Azərbaycana 380,793 milyon dollarlıq əmtəə idxal edilib ki, bu da ölkənin ümumi idxalının 32,87 faizini təşkil edir. Bu barədə Dövlət Gömrük Komitəsindən şənbə günü deyilib.
Birlik ölkələrindən Azərbaycana taxıl bitkiləri (ümumi idxalın 12,71 faizi), quru nəqliyyat vasitələri (10,65 faiz), avadanlıq və mexaniki qurğular (11,45 faiz), qara metaldan hazırlanmış məmulatlar (6,7 faiz), tütün və tütünün sənaye əvəzləyicisi (7,27 faiz) və s. gətirilib.
Azərbaycanın rezident və qeyri-rezidentləri MDB ölkələrinə 420,515 milyon dollarlıq (ölkənin ümumi ixracının 9,33 faizi) ixrac əməliyyatları həyata keçirib.
Birlik ölkələrinə əsasən, mineral yanacaq, beft və neft emalı məhsulları, bitum mineralları (ümumi ixracın 41,03 faizi), meyvə (2,46 faiz), yağ və heyvan və bitkimənşəli yağlar (12,74 faiz), gəmi, qayıq və digər üzücü vasitələr (28,12 faiz), şəkər və şirniyyat məmulatları(4,13 faiz) və s. ixrac edilib.
MDB ölkələri ilə ixrac və idxal əməliyyatlarından 39,722 milyon dollar müsbət saldo yaranıb.
