Azərbaycan, Bakı, 3 may /Trend, müxbir T.Cəfərov/
İranın daxili işlər nazirinin müavini Mehdi Məhəmmədifərin başçılıq etdiyi nümayəndə heyətinin Şamaxı şəhərinə səfəri çərçivəsində bu ölkənin "Iran Khodro" avtomobil şirkəti ilə EVSEN Şirkətlər Qrupu arasında ilkin razılaşma əldə olunub. Bu barədə Trend-ə İranın Azərbaycandakı səfirliyinin mətbuat xidmətinin rəhbəri Abbas İsgəndəri məlumat verib.
İsgəndərinin sözlərinə görə, ilkin razılaşmaya əsasən EVSEN şirkəti "Iran Khodro"nun Azərbaycandakı satış bazarında araşdırma aparacaq və tələbat olacağı halda İran şirkətinin məhsulları Şamaxıda yığılacaq.
İsgəndəri qeyd edib ki, İran şirkətinin məhsulları iri və kiçik yük avtomobillərindən, avtobus və mikroavtobuslardan ibarətdir.
Məhəmmədifər Şamaxıya səfəri zamanı müxtəlif sahələrdə, o cümlədən iqtisadi, mədəni və kənd təsərrüfatı sahələrində şəhərin potensialı ilə tanış olub. O, həmçinin "Azsamand" avtomobil zavodunun işi ilə də tanış olub.
