Azərbaycan, Bakı, 4 may /Trend, müxbir N.İsmayılova/
Belarus və Azərbaycan arasındakı əmtəə dövriyyəsi artım tendensiyasını 2010-cu ildə qoruyub saxlayacaq. Bunu Belarusun Azərbaycandakı fövqəladə və səlahiyyətli səfiri Nikolay Paskeviç çərşənbə axşamı mətbuat konfransında deyib.
"2007-ci ildən etibarən Azərbaycan və Belarus arasındakı əmtəə dövriyyəsinin həcmi beş dəfə artıb. Ötənilki qlobal maliyyə böhranına baxmayaraq, ölkələrimiz arasındakı əmtəə dövriyyəsi 15 faiz artıb. Cari ilin birinci rübündə bu artım tempi daha da sürətlənib və Belarusdan Azərbaycana ixracın artım həcmi 28 faiz təşkil edib", - Paskeviç deyib.
Onun sözlərinə görə, Azərbaycandan Belarusa ixracın həcmi də birinci rübə olan məlumata görə, illik hesablamalarda artaraq artım tendensiyasını saxlayıb.
"Azərbaycan İxracın və İnvestisiyaların Təşviqi Fondunun dəstəyi ilə Azərbaycan nümayəndə heyyətinin Minskə səfəri Azərbaycan idxalının artımının qorunub saxlanmasına müsbət təsir edəcək", - o deyib.
Onun sözlərinə görə, hazırda danışıqlar yalnız əmtəə dövriyyəsinin artırılmasını deyil, eyni zamanda, qonşu dövlətlərə gələcək ixrac üçün emal üzrə müştərək layihələrin həyata keçirilməsini əhatə edir.
