Аzərbaycan, Bakı, 7 iyun /Trend, müxbir Ü.İsmayılova/
İyul ayında Azərbaycan Sığortaçılar Assosiasiyası Maliyyə Nazirliyi ilə birgə yerli sığortaçılar üçün sığorta işi sahəsində biliklər fənni üzrə olimpiada keçirməyi planlaşdırır, - bazar ertəsi Azərbaycan Sığortaçılar Assosiasiyasının icraçı-direktoru Qafar Məcidov deyib.
"Olimpiadada iştirak etmək üçün, əsasən, gənc sığortaçılar dəvət olunacaq", - Məcidov bildirib.
Onun sözlərinə görə, hazırda tərəflər gənc sığortaçılar üçün planlaşdırılmış olimpiadanın məzmunu üzərində işləyirlər.
Azərbaycan Sığortaçılar Assosiasiyası 2006-cı ilin dekabrında təsis edilib. Assosiasiyanın tərkibinə bütün fəaliyyətdə olan sığortaçılar daxildir. Təşkilatın Müşahidə Şurasına Azərbaycanın beş sığorta şirkəti - MBASK, "Standard İnsurance", Beynəlxalq Sığorta Şirkəti, "Azərisığorta", "Atəşgah" daxildir.
Azərbaycanda 27 sığorta şirkəti fəaliyyət göstərir ki, bunlardan 2-nin lisenziya fəaliyyəti müvəqqəti olaraq dayandırılıb, 1-i isə təkrar sığorta şirkətidir. Yanvar-aprel ayları ərzində bütün sığortaçıların sığorta haqqının həcmi 53,73 milyon manat təşkil edib.
İyunun 7-nə rəsmi məzənnə 0,8037 AZN/USD təşkil edir.