Azərbaycan, Bakı, 25 iyun /Trend/
Ölkə bankları arasında nizamnamə kapitalının həcminə görə ikinci yeri tutan Azərbaycan bankı Paşa Bank iyunda nizamnamə kapitalını 115,407 milyon manata çatdırıb. Bu barədə bankın məlumatında deyilir.
Kapitalın artımı 2009-cu il ərzində əldə edilən gəlirin hesabına mümkün olub. Məlumatda deyildiyinə görə, bank 2010-2011-ci illərdə əldə ediləcək gəliri də kapitallın artırılmasına yönəldəcək.
Ümumilikdə bankın nizamnamə kapitalı dörd dəfə artıb. Bank təsis edilən zaman onun kapitalı 10 milyon manat olub. 2007-ci ildə 35 milyon manata, 2008-ci ildə isə 58 milyon manata çatdırılıb və nəticədə 100 milyon manat olub.
Ernst & Young şirkətinin apardığı auditin nəticələrinə görə, 2008-ci ilin sonuna bankın xalis gəliri 10,765 min manat, 2009-cu ildə isə 16,059 min manat təşkil edərək il ərzində 49 faiz artıb.
Paşa Bank 2007-ci ildə təsis edilib.
İyunun 25-nə olan rəsmi məzənnə 0,8038 AZN/USD təşkil edir.