Azərbaycan, Bakı, 30 iyun /Trend, müxbir E.İsmayılov/
Azərbaycan Nəqliyyat Nazirliyi Naxçıvan Muxtar Respublikası - Qars (Türkiyə) dəmiryol xətti layihəsi çərçivəsində işçi komissiya yaradır. Bu barədə çərşənbə günü nazirlikdəki mənbə bildirib. Naxçıvan hazırda Ermənistanın Azərbaycanın 20 faiz torpaqlarını işğal etməsi nəticəsində blokadadadır.
Onun sözlərinə görə, komissiyaya "Azərbaycan Dəmir Yolları" QSC-nin baş mühəndisi Qurban Nəzirov başçılıq etməlidir.
"Bu layihə çərçivəsində işçi qrupunun yaradılması üzrə işlər görülür və yaxın günlərdə təsdiqedici əmr imzalanmalıdır", - mənbə deyib.
Mənbənin qeyd etdiyinə görə, komissiya yaradılandan sonra göstərilən layihə üzrə işlərə başlayacaq.
Mənbə onu da bildirib ki, hazırda qrafikə uyğun Gürcüstan-Türkiyə sərhədində yeni dəmiryol məntəqəsinin tikilməsi üzrə işlər aparılır. Bu işlər Bakı-Tbilisi-Qars (BTQ) dəmiryol xəttinin yaradılması çərçivəsində həyata keçirilir.
Bakı-Tbilisi-Qars layihəsi çərçivəsində Axalkalaki-Marabda-Tbilisi dəmiryol məntəqəsinin tikintisini gürcü şirkəti və tenderin qalibi olmuş "Azərtikintiservis" aparacaq. İşlər uzunluğu 160 km olan mövcud dəmiryol xəttinin bərpasını nəzərdə tutur.
BTQ üzrə tikintinin 2011-ci ilin sonunda başa çatdırılması planlaşdırılıb.
Bakı-Tbilisi-Qars layihəsi çərçivəsində 76 km Türkiyə ərazisindən, 29 km isə Gürcüstan ərazisindən keçən yeni 105 kilometrlik dəmiryol magistralının tikintisi planlaşdırılır. Bundan əlavə, Gürcüstanda yükötürmə qabiliyyətinin ildə 15 milyon tonadək artırılması üçün 183 kilometrlik Axalkalaki-Marabda-Tbilisi dəmiryol məntəqəsi bərpa ediləcək. Həmçinin Axalkalakidə Gürcüstanda olan dəmir yolundan qatarların Avropaya keçməsi üçün məntəqənin inşa edilməsi planlaşdırılır.