Аzərbaycan, Bakı, 1 iyul /Trend, müxbir N.İsmayılova/
Azərbaycan banklarının ümumi aktivləri 2010-cu il iyunun 1-nə olan məlumatlara əsasən, 12,042 milyard manat təşkil edib ki, bu da mayın əvvəli və ilin əvvəlinə olan nəticələrdən müvafiq olaraq, 0,03 və 3,2 faiz çoxdur, - bu barədə çərşənbə günü Azərbaycan Mərkəzi Bankından verilən məlumatda deyilir.
İnvestisiya yatırımları mayda olan göstəricilərdən 0,1 faiz az olmaqla 874,95 milyon manat, müştərilərə verilən kreditlər 8241,52 milyon manat təşkil edib. Ölkənin maliyyə sektoruna ayrılan kreditlər və depozitlərin həcmi 1,7 faiz azalaraq 523,7 milyon manat təşkil edib. Hesabat dövrü ərzində müxbir hesablarındakı vəsaitlər 7,9% azalaraq, 849,01 milyon manat təşkil edib. 2010-cu il iyunun 1-nə olan məlumata görə, Azərbaycan banklarının nağd pul vəsaiti 34,9 faiz azalmaqla 438,44 milyon manat təşkil edib.
Azərbaycan banklarının məcmu öhdəlikləri 2010-cu il iyunun 1-də 0,2 % azalaraq, 9,995 milyard manat təşkil edib. Bundan 4491,05 milyon manat depozitlərin, 4669,11 milyon manat isə maliyyə bazarından alınan kredit və depozitlərin payına düşür.
İyunun 30-na olan rəsmi məzənnə 0,8039 AZN/USD təşkil edir.
