...

Azərbaycan AİB-in yol layihəsi çərçivəsində podratçının seçimi üzrə yeni tender elan edib

Biznes və iqtisadiyyat xəbərləri Materials 19 Avqust 2010 13:48 (UTC +04:00)

Azərbaycan, Bakı, 19 avqust /Trend, müxbir İ.Xəlilova/

Azərbaycan Nəqliyyat Nazirliyinin "Azəryolservis" ASC uzunluğu 22,15 kilometr olan Masallı-Astara avtomobil yolunun birinci hissəsində tikinti işlərinin aparılması üçün tender elan edib. Layihə Azərbaycan hökuməti və Asiya İnkişaf Bankı (AİB) tərəfindən birgə maliyyələşdirilir.

Podratçı ikizolaqlı yolu, iki yol kəsişməsi, 10 körpü, drenaj sistemi və kəsişən yolların üstündən salınan bir körpü tikməlidir.

İddiaçılar üçün aşağıdakı meyarlar müəyyən olunub: son üç il ərzində tikinti işlərinin minimum illik dövriyyəsi 100 milyon dollardan, aktivlər 23 milyon dollardan az olmamalıdır; podrad işi son beş il ərzində hər birinin minimum dəyəri 85 milyon dollar olmaqla, müqavilə üzrə olmalıdır. İddiaçılar, həmçinin, beş il ərzində iş təcrübəsinə malik olmalıdırlar; il ərzində, ən azı, bir milyon kubmetr torpaq örtüyünün tikintisi, ən azı, 8 min kvadratmetr körpünün salınması, ən azı, 150 min kubmetr və 90 min kubmetr asfaltın salınması.

Tenderdə iştirakın dəyəri 200 manat təşkil edir. Tender təklifləri 1,7 milyon manat həcmində zəmanətlə müşayiət olunmalıdır. Təkliflər 6 oktyabr saat 17:00-dək "Azəryolservis"də qəbul olunur (Bakı, Ü.Hacıbəyov küçəsi, 72/4). Əlaqə saxlanan şəxs - Adil Qocayev. Telefonlar: (+99412) 4930045, 4934665 (faks), email: [email protected].

Bundan əvvəl "Azəryolservis" texniki səbəblərə görə podratçının müəyyən edilməsi üzrə tenderin nəticələrini ləğv edib. Buna baxmayaraq, Nəqliyyat Nazirliyi üçüncü rüb ərzində podratçının seçimi ilə bağlı bütün məsələləri həll etməyi planlaşdırır.

"AİB-in şərtlərinə görə, ola bilər ki, podratçı yalnız yolun kənarındakı topraq sahəsinin alınması prosesi başa çatdıqdan sonra elan edilsin". Bu barədə bir qədər əvvəl nazirliyin məlumatında bildirilib.

Bu günlərdə AİB Masallı-Astara avtomagistralının bir hissəsinin yenidən qurulması layihəsi çərçivəsində Azərbaycan tərəfindən kredit vəsaitlərindən istifadə üçün müddəti 31 dekabr 2013-cü il tarixədək uzadıb. Bu barədə çərşənbə günü bankın Bakı filialından bildiriblər. Saziş 2008-ci ilin yanvarından qüvvəyə minəndən etibarən, kredit resursları, demək olar, istifadəsiz qalıb və onlardan istifadə müddəti 30 iyun 2010-cu il tarixdə başa çatıb.

Masallı-Astara yol sahəsi Asiya İnkişaf Bankının (AİB) 200 milyon dollar dəyərində krediti və Azərbaycan hökumətinin 49 milyon dollarlıq iştirak payı hesabına çəkiləcək.

Layihəyə başlamaq üçün başlıca məsələlərdən biri Masallı-Astara avtomagistralı yaxınlığında torpaq alışı planının həyata keçirilməsidir. Kredit razılaşmasının şərtlərinə əsasən, torpaq alışı ilə bağlı məsələ 2010-cu ilin iyununadək həll edilməli idi. Hökumətdən bildirildiyi kimi, bu proses praktik olaraq Masallı-Astara magistralının birinci hissəsində (21 kilomer uzunluğunda) başa çatıb ki, bu da bankın başlıca tələbi idi.

Masallı-Astara avtomagistralı üç əraziyə bölünüb. Hazırda avtomagistralın birinci ərazisinin (uzunluğu 21 km) tikintisi üzrə podratçı müəyyənləşir.

Layihə AİB Direktorlar Şurasında 2007-ci il sentyabrın 28-də təsdiqlənib, bankla kreditin verilməsi sazişi isə 2009-cu il yanvarın 15-də imzalanıb. "Asiya" bankının kredit resursları bankın adi resurslarından hissə-hissə (190 milyon dollar) 24 il müddətinə dördillik güzəştlə və ildə libor+0,6 faizlə verilib. 10 milyon dollar güzəştli kredit isə 32 il müddətinə, səkkizillik güzəştli dövrlə və güzəştli dövr ərzində 1 faizlə, qalan dövrlər üzrə 1,5 faizlə verilib. Kreditin güzəştli hissəsi avtomagistrala birləşən ikinci dərəcəli kənd yollarının yenidən qurulmasına hesablanıb.

Masallı-Astara avtomobil yolunun yenidən qurulmasına kredit "Multitranche Financing Facility" (MFF) mexanizmi çərçivəsində 500 milyon dollar məbləğində təqdim edilib və üç yol layihəsinin maliyyələşdirilməsinə hesablanıb. Bu günədək iki layihə razılaşdırılıb, AİB MFF çərçivəsində qalan vəsaitlərdən istifadəyə isə 2014-cü ilədək vaxt ayırıb.

Xəbər lenti

Xəbər lenti